Израильтяноря ужылэ лэ плаестар Синай и, кала прожылэ через и пустыня Фарано, авелэ андо форо Кадесо. Котэ о Иегова ԥэндя лэ Моисеёсти: «Бишал 12 манушэн, по ек анда кажно племя, кай тэ роздиқэн и ԥув Ханаано. Мэ камав тэ отдав кадэя ԥув лэ израильтянонэнди». О Моисеё витидя 12 манушэн и ԥэндя лэнди: «Жан андо Ханаано и диқэн, сар вся барёл пэ кодэя ԥув. Уӷанэн, савэ котэ мануша. И мануша зоралэ чи най? Жувэн вонэ андэ катуны чи андэ фороря?» Кадэла 12 мануша жылэ андо Ханаано. Машкар лэндэ сас о Иисусо Навино и о Халево.

И мануша, савэ жылэ тэ роздиқэн и ԥув, рисайлэ через 40 деса. Вонэ котар андэ инжиро, ӷранаты и виноӷрадо. Кадэла мурша росԥэндэ: «И ԥув андо Ханаано фартэ лащи. Но и мануша котэ фартэ зоралэ, круӷом фороря вуче стины». Тоди о Халево ԥэндя: «Амэ захутиласа лэн! Авэн май йто!» Ӷанэс, васо о Халево кадя ԥэндя? Важ кода кай во и о Иисусо Навино патянас лэ Иеговасти. Но кодэла дэш мурша ԥэндэ: «Най! И мануша котэ фартэ барэ, сар великаноря! Амэ сар кузнечикоря паша лэндэ!»

Израильтяноря фартэ росхоляйлэ. Вонэ линэ тэ ԥэнэн ек аврэсти: «Витидаса аврэ манушэс, кай тэ авэл барэдэр машкар амэндэ и рисаваса андо Египто. Состэ тэ жас андо Ханаано? Амэн котэ  умарэна!» О Иисусо Навино и о Халево ԥэндэ: «Трэбуй тэ кандас лэ Иеговас. На даран! Во амэн фэрия». Но израильтяноря на ашунэнас лэн. Вонэ даже закамлэ тэ умарэн кадэлэ дуен муршэн!

Сар пэ када вся диқэлас о Иегова? Во ԥэндя лэ Моисеёсти: «Мэ кадя бут стердэм важ израильтяноря, ай вонэ всаек на кандэн ман. Важ када вонэ жувэна 40 бэрш андэ кадэя пустыня, катэ вонэ и мэрэна. Кати лэндирэ бэятцэ, ай кадяжэ о Иисусо Навино и о Халево жувэна пэ ԥув, пала сави ԥэндэм, кай дава лэнди».