Aisraeli abuluka pa Phiri ya Sinai mbapita na n’thando ya Parani. Mudafika iwo ku mbuto inacemerwa Kadesi, Yahova apanga Mose: ‘Tuma amuna 12. Kwata munthu m’bodzi pa dzindza toera aende kasuzumira Kanani, dziko inafuna kupasa ine Aisraeli.’ Natenepa, Mose asankhula amuna 12 mbaapanga: ‘Ndokoni ku Kanani mukaone khala mataka ndi adidi toera kulima pyakudya. Onani khala anthu ndi amphambvu peno akufewa, pontho khala asakhala m’misasa peno m’mizinda.’ Anyakusuzumira dziko 12, kuphataniza Yoswa na Kalebu aenda ku Kanani.

Mudapita ntsiku 40, anyakusuzumira dziko abwerera. Iwo abweresa misapo ya figo, maroma na mauva. Anyakusuzumira alonga: ‘Ndi dziko yadidi, mbwenye anthu ali kweneko ndi amphambvu, pontho mizinda yawo iri na mipanda yakulapha.’ Buluka penepo, Kalebu alonga: ‘Tinakwanisa kuakunda. Tendeni cincino!’ Usadziwa thangwi yanji Kalebu alonga tenepo? Thangwi iye na Yoswa akhanyindira Yahova. Mbwenye anyakusuzumira khumi alonga: ‘Nkhabe! Anthu a kweneko ndi akugopswa ninga pimphona! Ndife ninga nthete pamaso pawo.’

Mudabva Aisraeli pyenepi akhala akufewa. Iwo atoma kudungunya mbalonga: ‘Tendeni tisankhule ntsogoleri unango, tibwerere ku Ejito. Thangwi yanji tisafunika kuenda kweneko toera tiphiwe?’ Yoswa na  Kalebu alonga: ‘Bverani Yahova, pontho lekani kugopa. Yahova anatitsidzikiza.’ Mbwenye Aisraeli nee abvera. Iwo asaka kupha Yoswa na Kalebu!

Kodi Yahova acitanji? Iye apanga Mose: ‘Ndacita pinthu pizinji pamaso pa Aisraeli, mbwenye iwo akupitiriza kukhonda kundibvera. Natenepa, iwo anakhala n’thando mu pyaka 40 mpaka kufa kwawo. Basi ene anapianawo, Yoswa na Kalebu anadzapita mu dziko idaapikira ine.’