Azo ti Israël aquitté Hoto ti Sinaï, ala hon na yâ ti benyama ti Paran ti gue na ndo so a iri ni Cadès. Kâ, Jéhovah atene na Moïse: ‘Tokua akoli 12, koli oko na yâ ti mara oko oko, ti gue ti bembe kodro ti Canaan so mbi yeke mû ande na azo ti Israël.’ Tongaso, Moïse asoro akoli 12 na lo tene na ala: ‘Ala gue na Canaan ti bâ wala sese ni ayeke nzoni ti lu alê ti kobe dä. Ala bâ wala azo ti kodro ni ayeke azo so ayeke ngangu wala ala yeke ngangu pëpe nga ala bâ wala ala yeke lango gï na gbe ti atente wala na yâ ti akota gbata.’ Azo ti bembengo ndo 12, so na popo ni a yeke wara Josué na Caleb, alondo fadeso ague na Canaan.

Na peko ti lango 40, azo ti bembengo ndo ni akiri, na ala ga na lê ti keke ti figue, ti grenade nga na ti vigne. Ala tene: ‘Kodro ni ayeke nzoni, me azo ti kodro ni ayeke angangu zo, agbata ni ayeke na angangu gbagba so ayo na nduzu mingi.’ Na pekoni, Caleb atene: ‘E lingbi ti hon ala na ngangu. E londo hio e gue.’ Mo hinga ndani so Caleb atene tënë tongaso? Ndali ti so lo na Josué asara confiance na Jéhovah. Me atanga ti azo ti bembengo ndo ni bale-oko atene: ‘Ên-ën! Azo ni ayo mingi. E bâ so e yeke tongana angadi na lê ti ala.’

Azo ti Israël adécouragé. Ala komanse ti dema na ala tene na popo ti ala atene: ‘Zia e soro mbeni zo ti mû li ni na ndö ti e, na e kiri na Égypte! Ngbanga ti nyen e gue na kodro so ti tene a fâ e?’ Josué na Caleb atene: ‘Ala sara kpengba-li na Jéhovah pëpe; nga ala sara  mbeto pëpe. Jéhovah ayeke bata e.’ Me azo ti Israël ni ake ti mä ala. Ala ye même ti fâ Josué na Caleb!

Nyen la Jéhovah asara? Lo tene na Moïse: ‘Na peko ti aye kue so mbi sara na azo ti Israël, ala ngbâ ti sara kpengba-li na mbi. Ala yeke ngbâ na yâ ti benyama teti ngu 40, juska ala kui kâ. Gï amolenge ti ala nga na Josué na Caleb la ayeke si ande na kodro so mbi mû zendo ni ti mû na ala.’