Israeelete manni Siina Ilaalinni kae, Faaraani Halalli widoonni hige Qaadesi yinanniwa haˈri. Hakkiicho Yihowa Musera togo yii: ‘Israeelete mannira eemmo yoommota Kanaani gobba qotte higganno gede, gaˈre gaˈrentenni doorte 12 manna soyi.’ Konni daafira Muse 12 manna doore togo yiinsa: ‘Kanaani gobba hadhine, baatto shaqqadoteronna moolatero, mannu laafahoronna jawaatahoro, hattono dunkaanaho heeˈrannohoronna katamaho heeˈrannoro laˈine amme.’ Tonaalame qotaano Kanaani gobba hadhu; insa giddo lamu Iyyaasunna Kaaleebiiti.

Shoyilluu barri gedensaanni qotaano woyinete, roomaanetenna balasete laalo haadhe daggu. Qotaano togo yitu: ‘Baatto shaqqadote; mannu kayinni wolqaataamoho; katammano jajjabbate.’ Hakkiinni Kaaleebi, ‘Qeelleemmonsana haˈno!’ yii. Kaaleebi togo yiinohu mayiraatiro afootto? Isinna Iyyaasu Yihowa addaxxitino daafiraati. Kuˈuri tonne qotaano kayinni togo yitu: ‘Dihaˈneemmo! Hakko heeˈranno manni jigeeyyete! Insa mule ninke koroˈmiisu geeshshire ikkinoommo.’

Israeelete manni waajji. Insa insanaawa togo yii: ‘Amme hakkira haˈne reyine goonfammonte, massagannonkeha doodhine Gibitse hingona.’ Iyyaasunna Kaaleebi kayinni togo yitu: ‘Yihowara hajajama  gibbinoonte, hattono waajjitinoonte. Yihowa agarannonke.’ Israeelete manni kayinni insa yitinore dimacciishshino. Insa Iyyaasunna Kaaleebi shaa nafa hasidhino!

Hakkiinni Yihowa maa assinoro afootto? Isi Musera togo yii: ‘Israeelete manni assoommo maalale afanni heeˈrenni hajajama giwinoe. Konni daafira insa 40 diro halalla raataabbanni keeshshite reyitanno. Eemmoˈne yee xaaroommo gobba oosonsa, Iyyaasunna Kaaleebi calla ragidhanno.’