Na ō ese tagata Isaraelu mai i le mauga o Sinai ma ui atu i le toafa o Parana, ma agaʻi atu ai i se nuu e taʻua o Katesa. O i inā na faapea atu ai Ieova iā Mose: ʻIa auina atu ni tamāloloa e toʻasefulu lua, e taʻitasi mai i le ituaiga, e ō faalilolilo e vaavaai i le nuu o Kanana, le nuu lea o le a ou foaʻiina atu i tagata Isaraelu.’ O lea na filifilia ai e Mose ni tamāloloa e toʻasefulu lua ma fai atu iā i latou: ʻIa ō i Kanana ma vaavaai pe lelei le laueleele mo meatotō. Ia vaavaai pe vaivai pe malolosi tagata, ma po o latou nonofo i faleʻie po o aai.’ Na ō loa tagata vāai e toʻasefulu lua e aofia ai Iosua ma Kalepo.

Ina ua mavae aso e 40, na toe foʻi mai tagata vāai ma aumai laau o mati, rimoni ma vine. Na latou faapea mai: ʻO se nuu e lelei le laueleele. Ae e malolosi tagata ma e maualuluga pā o aai.’ Ona faapea mai lea o Kalepo: ʻE mafai ona tatou manumalo iā i latou. Tatou ō loa!’ Pe e te iloa le māfuaaga na faia ai e Kalepo lenā faamatalaga? Talu ai na la maufaatuatuaina ma Iosua Ieova. Ae na faapea mai isi tagata vāai e toʻasefulu: ʻE leai. E tetelē tino o tagata e pei o ni sauʻai. E pei i tatou o ni sē akerise pe a faatusatusa iā i latou.’

Na lotovaivai tagata Isaraelu, ma amata ona tomumumu ma faapea atu le tasi i le isi: ʻSeʻi o tatou filifili se isi taʻitaʻi ma tatou toe foʻi i Aikupito. Aiseā e tatou te ō atu ai fua i lenā nuu ma feoti ai?’ Na tali atu  Iosua ma Kalepo: ʻAua neʻi outou lē usiusitaʻi iā Ieova, ma aua neʻi outou fefefe. E puipuia i tatou e Ieova.’ Ae e leʻi usiusitaʻi tagata Isaraelu. Na latou mananaʻo foʻi e fasioti Iosua ma Kalepo.

O le ā na faia e Ieova? Na ia faapea atu iā Mose: ʻUa faaauau pea ona lē usiusitaʻi tagata Isaraelu iā te aʻu e ui i mea uma na ou faia mo i latou. O lea, o le a latou nonofo ai pea i le toafa mo tausaga e 40, ma feoti ai i inā. E na o a latou fanau ma Iosua ma Kalepo o le a nonofo i le laueleele na ou folafolaina atu iā i latou.’