Tau Israel něněntang Wul᷊udu Sinai kụ nakoạ sarang Kades. I sire limiu Gurun Paran. Su Kades, Yehuwa nẹ̌bera si Musa, ’Oroko 12 esẹ, sěngkatau bọu sěmbaụ suku gunang měmarikěsa ěntanang Kanaan. Ěntana ene sarung Takụ gělịkang su tau Israel.’ Hakị u ene, i Musa němile 12 esẹ kụ naul᷊ị si sire, ’Dakọe sarang Kanaan. Pěmanda apa ěntanane masuburẹ̌ arau tala, apa taumatane lome arau matoghasẹ̌, kụ apa i sire mětẹ̌tana su kemah arau su soạ.’ Bọu ene i Yosua, Kaleb, dingangu mapul᷊o mata-mata wal᷊inẹ nakoạ sarang Kanaan.

Nal᷊iu bọu 40 su ěllone, i sire nẹ̌bal᷊ị apidu nẹ̌bawa buang ara, delima, dingangu anggorẹ̌. I sire nělaporẹ̌, ’Ěntana ene masadadạ. Katewe, taumatane matoghasẹ̌ kụ těndạu soang i sire mararangẹ.’ Bọu ene i Kaleb nẹ̌bera, ’I kitẹ botonge makakala si sire. Mahịe i kitẹ matamai!’ Tumuhụ si kau, kawe nụe i Kaleb sěbạe bahani? Ual᷊ingu i sie dingangi Yosua mangimang si Yehuwa. Katewe, mapul᷊o mata-mata wal᷊inẹ naul᷊ị, ’Abe! I sire ene kai kere angsuang! Mạeng ipẹ̌sul᷊ung dingangi sire, i kitẹ ini kere kal᷊imbotong.’

Tau Israel natakụ. I sire naul᷊ị, ’Mahịe i kitẹ měmile těmbonang buhu kụ mẹ̌bal᷊ị sarang Misirẹ̌. Mạeng i kitẹ sarang Kanaan, i kitẹ sarung mate.’ Yosua dingangi Kaleb nẹ̌bera, ’I kitẹ harusẹ̌ matuhụ si Yehuwa.  Abe katakụ. Yehuwa sarung měndiagạ si kitẹ.’ Katewe tau Israel tawe dimaringihẹ̌. Kụ i sire lai mapulu měmate si Yosua dingangi Kaleb!

Apa nikoạ i Yehuwa? I Sie naul᷊ị si Musa, ’Iạ seng někoạ lawọ hal᷊ẹ̌ gunang tau Israel, katewe i sire tatapẹ̌ tawe timuhụ. Hakị u ene, i sire sarung tatapẹ̌ mẹ̌tanạ su padang belantara karěngụe 40 su taunge kụ mate sene. Kětạeng manga anạ i sire, lai i Yosua dingangi Kaleb, sarung mẹ̌tanạ su ěntana seng Takụ niriandi.’