Bi̱ israelitas nigájnun náa kúbá Sinaí. Nigún náa ku̱ba̱ʼ mixooʼ ndrígóo Parán asndu niguáʼnu náa xuajin dí mbiʼyuu Cadés. Ikhí Jeobá niʼthúu̱n Moisés: “Ataxúʼmiin mbá 12 xa̱bekha, mbáwíi gagájnuu mámbá tribu, mu magún guyama Canaán, ku̱ba̱ʼ rí maxnu̱u̱n israelitas”. Ikha jngó Moisés niraʼwíin 12 xa̱bekha ga̱jma̱a̱ niʼthúún: “Guʼguala náa Canaán ga̱jma̱a̱ gu̱ya̱a̱ á mu ku̱ba̱ʼ májánʼ majuiʼdu. Ma̱ngaa gu̱ya̱a̱ á mu xa̱bu̱ gújkuíínʼ o na̱nguá, á mu kúwi̱i̱n náa guʼwá xtíin o kuwa náa guʼwá dí kúgoo ga̱jma̱a̱ xtátsí”. Mbá 12 xa̱bekha ma̱ngaa Josué ga̱jma̱a̱ Caleb nigún mu muyama náa Canaán.

Bi̱ nuyama nitangi̱ín 40 mbiʼi nda̱wa̱á. Niguwáʼ kudúún higos, granadas ma̱ngaa uvas, ga̱jma̱a̱ nithi rígi̱: “Canaán nindxu̱u̱ mbá ku̱ba̱ʼ májánʼ, mú xa̱bu̱ phú gújkuíínʼ, ga̱jma̱a̱ xuajin guáʼdáá xtátsí tsidaanʼ wéñuʼ”. Ikhú Caleb niʼthí: “¡Maʼngulú muʼni gajmiúlú! Guʼgua̱”. Náa numuu ku̱ma̱ʼ ikháánʼ rí Caleb niʼthí rúʼko̱ rá. Numuu rí ikhaa ga̱jma̱a̱ Josué nikumu̱ún kuyáá Jeobá. Mú iʼwíínʼ xa̱bekha nithi: “Maxuʼgualú. Numuu rí xa̱bu̱ bi̱ kuwa ikhí mba̱ʼu̱u̱n wéñuʼ. Inún ikhiin, ikháanʼ nidxulú xóo tsíʼbu”.

Bi̱ israelitas ni̱jkha̱ a̱jkiu̱ún, nigi̱ʼdu̱u̱ nitamijná: “Guʼyáaʼ imba̱a̱ bi̱ mbayá edxu̱u̱ ga̱jma̱a̱ gutangáanʼ náa Egipto. Náa numuu mu̱ʼgua̱ náa Canaán rá. Numuu rí muradiáanʼlu dxe̱ʼ”. Josué ga̱jma̱a̱ Caleb  nithi: “Itháan májánʼ muʼnimbulúʼ kuʼyáá Jeobá. Ikhaa mañewu̱nlú. Xámiñalaʼ”. Mú israelitas túnimbu̱ún. Nindúún gúxiyáa Josué ga̱jma̱a̱ Caleb.

Ndiéjunʼ niʼni Jeobá rá. Niʼthúu̱n Moisés: “Nini mbaʼa rí májánʼ ga̱jma̱a̱ numún israelitas..., mú ikhiin xóó tsénimbu̱ún kuyoʼ. Ikha jngó maniʼñúunʼ náa ku̱ba̱ʼ mixooʼ rígi̱ mbá 40 tsiguʼ asndu mbiʼi rí makhañún. I̱ndó e̱jñún ikhiin, Josué ga̱jma̱a̱ Caleb, makuwá náa ku̱ba̱ʼ rí nitha maxnu̱u̱n israelitas”.