Nienga i Vohy i Sinaỳ o Israelitao sady nandeha tamy ty tane fatrambey i Parana. Niavy ta Kadesy agne iareo tamy ty fara’e. Le hoe ty Jehovah tamy i Mosesy: ‘Mandefasa lahilahy 12, raike isam-poko, le iraho iareo hagnente ty tane Kanana.’ Le izay ty natao i Mosesy. Hoe reke tamy i 12 lahy rey: ‘Mandehana ho a Kanana agne, le henteo tie mahavokatse i taney. Henteo ka tie matanjake ty ndaty agne, sady naho mitoboke agnate tanàgne ndra an-tragno lay.’

Ie niafake 40 andro, le niheregne i mpitsikilo rey sady nanday fihamy, ampongabeindagnitse naho voaloboke. Hoe iareo: ‘Soa i taney! Faie matanjake ty ndaty ao sady abo bey ty manda i tanàgney.’ Le hoe ty Kaleba: ‘Andao ho mbeo fa ho resentikagne iareo.’ Natoky ty Kaleba naho i Josoa fa hagnampe iareo ty Jehovah. Faie hoe i mpitsikilo folo rey: ‘Ko ndra mandeha mbeo fa bey naho abo ty ndaty agne. Manahake o valalao tikagne ty amy iareo.’

Le nanomboke nigneogneogne iareo. Hoe iareo: ‘Andao tikagne hifily mpitarike hafa, le hiheregne a Ejipta agne, fa ho mate atoy iaby tikagne.’ Le hoe ty Josoa naho i Kaleba: ‘Ko matahotse fa oriho avao  ze raha saontsie i Jehovah. Hiaro antikagne reke.’ Faie tsy nitsanogne o Israelitao sady nikinia ty hamono iareo roe lahy.

Nahafale i Jehovah vao zay? Hoe reke tamy i Mosesy: ‘Le mbe tsy mankatò ahy avao o Israelitao ndra tie fa maro ty raha nataoko hoahy iareo! Hazìko an-tane efetse atoy agnate ty 40 taogne iareo sady lelia’e ho mate atoy. Fa ty ana iareo vaho i Josoa naho i Kaleba avao ro tsy ho mate, le hahatrea i tane homeiko iareoy.’