Yange Mbaiserael mough hen Uwo u Senai, kar ken deserti u Paran za haa afo hen ijiir igen, iti i ijiir la ér Kadeshi. Hen shighe la, Yehova kaa a Mose ér: ‘Tsua iorov 12 ken hanma kwe u Mbaiserael, tindi ve, ve za fa akaamyer a ken tar u Kanaan, tar u m soo u nan Mbaiserael la.’ Ka i yila ior mba eren imba tom la ér “mbamkerev.” Tsô Mose tsua nomsombaiorov 12, kaa a ve ér: ‘Za nen ken tar u Kanaan za nenge nen aluer ka tar u doon iyiav yô. Nenge nen, aluer ior mba ken tar la mba a agee shin mba a mi ga, shi vea lu tsan ken adô a ya shin ken ugeri yô.’ Tsô mbamkerev mba 12 mbara mough yem ken tar u Kanaan. Mbagenev ken a ve yô, lu Yosua man Kalebu.

Ayange 40 nga karen yô, mbamkerev mbara za hide, ve va a atam a tur man a wain man a kon ugen, iti i u ér pomegraneti. Mbamkerev mbara kaa ér: ‘Tar la doo, kpa ior mba ve lu ker la mba a agee kpishi, shi ve maa ugeri vev ve kase. Ukpekpe mba ugeri mbara tav sha geng.’ Tsô Kalebu gema kaa ér: ‘Se fatyô u hemban ve. Se za nen fese!’ U fa kwagh u yange na ve Kalebu ôr nahan kpa? Lu sha ci u un kua Yosua ve na Yehova jighjigh. Kpa mbamkerev mba puev mbagenev mbara kaa ér: ‘Ei! Ior mba ken tar la kehe mba er ka akôraior nahan! Yange sea tile ikyua a ve yô, se lu cuku er ka mbaahungwa nahan.’

Yange iyol kpe Mbaiserael. Maa ve gba zôhôn kaan ér: ‘Se tsua nen  orhemen ugen, nana hemen se se hide se yem ken Igipiti. A er nan se za ken tar la ser i gba za wuan se dang nahana?’ Yosua man Kalebu gema kaa ér: ‘De hemban nen Yehova ato ga, shi de cian nen kpaa ga. Yehova una kura se.’ Kpa Mbaiserael venda, je ve nôngo u wuan Yosua vea Kalebu!

Nahan Yehova er nena? A kaa a Mose ér: ‘M er hanma kwagh sha ci u Mbaiserael, kpa mba ungwan imo yam ga. Nahan vea tsa ken deserti heen anyom 40, shi vea kpe her. Ka ônov vev kua Yosua man Kalebu tseegh vea nyôr ken tar u m tende zwa u nan ve la ye.’