Израильчилер Синай дагдан чорупкаш, Фаран деп кургаг ховуну эрткеш, Кадеске келген. Иегова Моисейге мынча дээн: «Аймак бүрүзүнден бир кижиден шилип алгаш, израильчилерге мээң бээр дээн черимни, Ханаанны, көрүп эккээр кылдыр, 12 кижиден чоргузувут». Моисей 12 кижини шилээш, оларга: «Ханаанче барып, билип эккелиңер. Ол чер дүжүткүр бе? Ында кижилер күштүг бе азы кошкак бе? Олар майгыннарда азы хоорайларда чурттап турар бе?» — дээн. Ол 12 кижи, оларның санында Нуннуң оглу Иисус биле Халев, Ханаанче чорупкан.

40 хонук эрткенде, хайгыылчылар чедип келген. Олар инжир, гранат, виноград эккелген. Олар: «Ханаан чер аажок дүжүткүр-дүр. Ынчалза-даа ында улус дыка күштүг, а хоорайны долгандыр бедик ханалар бар-дыр» — дээн. Ынчан Халев: «Бис ол черни эжелеп шыдаар бис! Ам дораан бараалыңар!» — деп чугаалаан. Халев чүге ынча дээнил, билир сен бе? Чүге дизе ол Нуннуң оглу Иисус-биле кады чүгле Иеговага ынанып турганнар. Ынчалза-даа арткан 10 кижи: «Чок! Ында улус аажок улуг, шыырак-тыр! Бис оларның чанынга шартылаалар дег боор бис!» — деп алгыржып эгелээн.

Израильчилер аажок муңгарай бергеннер. Олар хорадап: «Өске баштыңдан шилип алгаш, Египетче дедир чоруулуңар. Чүге Ханаанче баргаш, өлүртүр ужурлуг улус бис?!» — дижип турган. Нуннуң оглу  Иисус биле Халев: «Кортпаңар, Иегованы дыңнаалыңар, ол бисти камгалаар!» — дишкеннер. Ынчалза-даа израильчилер оларны дыңнаваан. Безин олар Нуннуң оглу Иисус биле Халевти өлүрер деп барганнар.

Иегова канчалган? Ол Моисейге чугаалаан: «Израильчилерге ынча хөй чүүлдү кылырымга-даа, олар мени дыңнавас-тыр. Ол дээш олар ээн кургаг ховуга 40 чыл чурттааш, аңаа өлүрлер. Мээң оларга аазаан черимче чүгле оларның ажы-төлү, Нуннуң оглу Иисус болгаш Халев кирер».