An mga Israelita bumaya ha Bukid Sinai ngan umagi ha disyerto han Paran basi kumadto ha lugar nga gintatawag nga Kades. Didto, hi Jehova nagsiring kan Moises: ‘Pagsugo hin 12 nga lalaki, usa ha kada tribo, basi mag-espiya ha Canaan, an tuna nga ihahatag ko ha mga Israelita.’ Salit nagpili hi Moises hin 12 nga lalaki ngan nagsiring ha ira: ‘Kadto kamo ha Canaan ngan kitaa kon maopay ba an tuna para ha pag-uma. Kitaa kon magluya o magkusog ba an mga tawo ngan kon ha mga tolda o ha mga syudad ba hira naukoy.’ An 12 nga espiya, upod na hira Josue ngan Caleb, kumadto ha Canaan.

Paglabay hin 40 ka adlaw, binalik an mga espiya nga may dara nga mga igos, prutas nga granada, ngan ubas. Hira nagsiring: ‘Maopay an tuna, pero magkusog an mga tawo didto ngan hitaas an mga pader han mga syudad.’ Katapos, hi Caleb nagsiring: ‘Mapipirde naton hira. Pakadto dayon kita!’ Maaram ka ba kon kay ano nagsiring hito hi Caleb? Tungod kay hiya ngan hi Josue nasarig kan Jehova. Pero an napulo nga espiya nagsiring: ‘Ayaw! Dagku gud an mga tawo didto, pariho hin mga higante! Sugad la kita hin mga apan kon isasapit ha ira.’

Nahadlok an mga Israelita. Nagtikang hira magreklamo ngan magsiring ha kada tagsa: ‘Pagpili kita hin bag-o nga lider ngan balik kita ha Ehipto. Kay ano nga makadto kita hito nga lugar basi la mamatay?’ Hira Josue  ngan Caleb nagsiring: ‘Ayaw kamo pagrebelde kan Jehova, ngan ayaw kamo kahadlok. Puproteksyonan kita ni Jehova.’ Pero waray mamati an mga Israelita. Karuyag pa ngani nira patayon hira Josue ngan Caleb!

Ano an ginhimo ni Jehova? Nagsiring hiya kan Moises: ‘Katapos han akon mga ginbuhat ha mga Israelita, diri la gihap hira namamati ha akon. Salit magpapabilin hira ha kamingawan ha sulod hin 40 ka tuig ngan dinhi hira mamamatay. An ira la mga anak ngan hira Josue ngan Caleb an makakaukoy ha tuna nga akon iginsaad ha ira.’