Niala tamy Bongo Sinay Israelita aby io, baka io nandalo tamy tany paiky ta Parana. Iro amy zay navy ta Kadesy. Tao Jehovah nivolan̈a tamy Mosesy: ‘Mifidiana lelahy 12, araiky isaka foko, baka io iraha iro hitsikilo tany Kanana. Fotony tany io hamiako Israelita.’ Ke Mosesy baka tio nifidy lelahy 12. Volan̈iny tamindro: ‘Mindao a Kanana, zahava asa tany io mety ambolian̈a. Zahava koa asa matanjaka olo an̈y, asa fo iro an̈y mipetraka amy tanàna na an̈aty tran̈olay.’ Nandeha ta Kanana amy zay iro pitsikilo 12, an̈isandro io Josoa ndreky Kaleba.

Nimpody iro pitsikilo aby io koa afaka 40 andra, iro nitondra aviavy ndreky ampongabendan̈itry, baka io rezain. Iro nivolan̈a: ‘Tsara zalahy tany an̈y e! Kanefa olo an̈y maro fatatra aby, baka io lakorony tanàna an̈y an̈abo be.’ Kaleba nivolan̈a: ‘Alo atsika zioty hanafiky iro io fa ho resintsika!’ Kaleba ndreky Josoa natoky fa Jehovah han̈ampy Israelita. Fa pitsikilo folo aby io nivolan̈a: ‘Aza mandeha, fa iro an̈y olo be fatiarin̈y. Karaha kijeja aby zahay tankilandro.’

Kivy mare Israelita aby io. Iro nin̈on̈on̈o sady nifampivolan̈a karaha ty: ‘Alo atsika hifidy pitariky hafa hitondra atsika himpody a Ezipta, fa atsika jiaby io hofoaty atỳ.’ Josoa ndreky Kaleba nivolan̈a:  ‘Areva fo volan̈a Jehovah. Aza mavozo fa hiaro atsika izy.’ Tsy nitandren̈y raha nivolan̈iny Josoa ndreky Kalefa foeky Israelita aby io. Iro aby saiky namono iroroe.

Naharavoravo Jehovah ma zen̈y? Hoizy tamy Mosesy: ‘Zahava raha marobe efa nataoko taminy Israelita zay, kanefa iro mbala tsy man̈araka volan̈anaka fo. Hadokoko amy tany paiky atỳ iro an̈atiny 40 taon̈o, ambilà iro hofoaty atỳ. Fa zanakandro, baka io Josoa ndreky Kaleba fo ambelako hipetraka amy tany handeha hamiako iro io.’