Ayisalayeli ŵatyosile pa Litumbi lya Sinayi ni ŵajinjililaga ku Kadesi acipitilaga m’cipululu ca Palana. Ali ayice ku Kadesi, Yehofa ŵamsalile Mose kuti, ‘Mtumisye acalume 12, ŵakutyocela mu lukosyo lulilose kuti jemanjaji akasonde cilambo ca Kanani, cilambo cele cinjicipeleka kwa Ayisalayeli.’ M’yoyo Mose ŵasagwile acalume 12 ni ŵasalile kuti, ‘Mjawule ku Kanani kuti mkalole naga cilamboco cili cambone kulima mbeju. Mkalolesoni naga ŵandu ŵakwe ali ŵamacili mnope kapena iyayi soni naga akutama m’matenti kapena m’misinda jekulungwa.’ Mwa ŵakusonda 12 ŵala, mwaliji Yoswa soni Kalebi, wosopewo ŵanyakwice kwawula ku Kanani.

Pali pamasile masiku 40, ŵakusonda ŵala ŵawusile ali ajigele nguju, mipeleya soni yisogosi yine. Ŵakusondawo pakusala ya kumaloko ŵatite, ‘Kuli kumalo kwambone, nambo ŵandu ŵakwe ali ŵamacili soni misinda jawo jikwete mapupa gelewu mnope.’ Kaneko Kalebi ŵatite. ‘Mpaka tukombole kwagomeka. Kwende tujawule!’ Ana mkumanyilila ligongo lyakwe Kalebi ŵaŵecete yeleyi? Lili ligongo lyakuti jwalakwe soni Yoswa ŵakulupililaga Yehofa. Nambo ŵakusonda 10 ŵanewo ŵatite, ‘Tukatenda yeleyo! Ŵandu ŵakwe ali ŵacakulungwakulungwa mnope mwamti m’weji tuli mpela yitete kwa jemanjajo.’

Ayisalayeli ŵatesile woga, mwamti ŵatandite kudandawula nikusalilanaga kuti, ‘Kwende tusagule mundu jwine kuti aŵe mlongola jwetu ni tuwujile ku Iguputo. Nambi tujawule ku malo kwakuti tukawulajidwe?’ Nambo Yoswa ni  Kalebi ŵatite, ‘Akamjimucila Yehofa, soni akakola woga. Yehofa catucenjele.’ Nambo Ayisalayeli nganapikanila, mwamti ŵasakaga kuti agambe kuwulaga Yoswa ni Kalebi.

Nambo ana Yehofa ŵatesile cici? Ŵamsalile Mose kuti, ‘Yosope yambele mkwatendela Ayisalayeli yila, nditu jemanjaji akwendelecelape kunjimucila. Sambano catame m’cipululu kwa yaka 40, soni caciwa. Ŵanace ŵawope yalumo ni Yoswa soni Kalebi cacitama m’cilambo canatesile nawo cilanga kuti cinjapa.’