Biree ca israelita de ra nuu dani Sinaí. Gudíʼdica lu desiertu stiʼ Parán dede yendacaʼ ti lugar ni láʼ Cadés. Raqué gudxi Jiobá Moisés: «Biseendaʼ 12 hombre, tobi de cada tribu, para chiguuyacaʼ ximodo nuu guidxi Canaán, layú ni chigudieeʼ ca israelita». Ngue runi gulí Moisés 12 hombre ne gúdxibe laacaʼ: «Laché Canaán, laguuyaʼ pa galán ca layú sticaʼ. Laguuyaʼ pa nadipaʼ ca binni nuu raqué o pa coʼ, pa nabézacaʼ ndaaniʼ yoo de lari o pa maʼ bicuicaʼ lídxicaʼ». Óraque biree 12 espía que zecaʼ Canaán. Ládecabe zeʼ Josué ne Caleb.

Bibiguetaʼ ca espía que 40 dxi despué. Bedanecaʼ duʼgaʼ (higos), granada ne uvas, ne ndiʼ nga ni guníʼcabe: «Galán guidxi Canaán, peru guizáʼ nadipaʼ ca binni nuu raqué ne nabé nasoo ca muru stini». Óraque guníʼ Caleb: «¡Chuu! ¡Zanda guni ganarnu laacabe!». ¿Xiñee rábiluʼ guníʼ Caleb zacá yaʼ? Purtiʼ laabe ne Josué nápacabe confianza Jiobá. Peru ndiʼ nga ni guníʼ chii espía que: «Qué ziuudinu. Naroʼbaʼ ca binni nuu raqué, ruluíʼ gigante laacaʼ. Pa guchaaganu laacabe né laanu la? zeeda gácanu casi uxharu (saltamontes) cuéʼcabe».

Bidxibi ca israelita ne bizulú guca quejarcaʼ ne guniʼcaʼ: «Guyúbinu sti xaíque ne guibiguétanu Egipto. ¿Xi para chuunu Canaán? ¿Para guuticabe laanu la?». Óraque ná Josué ne Caleb: «Jma galán  guzúʼbanu stiidxaʼ Jiobá. Laabe zápabe laanu. Cadi guidxíbitu». Peru nin qué nulabi ca israelita laacabe. Laga gucaláʼdxicaʼ ñuuticaʼ Josué ne Caleb.

¿Xi biʼniʼ Jiobá yaʼ? Gúdxibe Moisés: «Maʼ huayuneʼ stale cosa pur ca israelita..., peru nin ne zacá cadi cuzuubacaʼ stiidxaʼ. Nga runi zusaanaʼ laacabe lu desiertu riʼ 40 iza dede ra gáticabe. Ca xiiñisicabe, ne Josué ne Caleb ziuucaʼ lu layú ni bineʼ prometer gudieeʼ ca israelita».