AYisaraere aguari Bagangara Sinai yo ka ndu rogo gu ugu-ngbii-ngume nga Parana ku rogo gu ba du rimoho nga Kadesa. Yo du Yekova aya ni fu Moize: ‘Mo kedi akumba 12, dagba angbatunga ni basasa, i ndu ka maa ringara Kanana nga gu ringara mi nika fuhe fu aYisaraere.’ Si du Moize asia akumba 12 ti ni na ki ya fuyo: ‘Oni ndu ku Kanana yo, ka bihe singia gu ringara re ngbaangba tipa rũko ahe. Oni bi agu aboro du yo singia nyanyaki aboro du watadu rurungbura aboro, singia i naraka rogo gbata watadu abamburoko.’ Agu abamoirago 12 re kodihe na Yosua na Kareba andu ku Kanana yo.

Fuo arame 40, agu abamoirago re ayego na zuzu vurumo, gbiati gu kura arindingua. Agu abamoirago re aya: ‘Si nga wene ringara, ono agu aboro du yo ima nyaka na gayo ndugu gbata ni gbangaha.’ Fuani, Kareba aya: ‘Ani rengbe arengba ka diabeyo. Ani ndu awere!’ Ya mo mo ini ndu gupai Kareba ape gupai re ti ni? Bambiko ko na Yosua aakido kuti Yekova. Ono gu kura abamoirago 10 ki ya: ‘Oó! Agu aboro du yo ima du ni kindigi yo, wakina diangbadiangba aboro! Ani wakina abakirigba bangiriyo.’

Rago aima gberã ti aYisaraere. I ki tona ka kpakanahe na kini ya dagbatiyo wẽ: ‘Ani sia gu kura bangbembatayo tipa ka karagatirani ku Ezipeta yo. Ya mo si aaida i karagatiyo ku rogo gu ba i nika imoyo  aimo rogoho?’ Yosua na Kareba aya: ‘Ka oni basanga sangba Yekova ya, na ka oni gundenga ya. Yekova nika banda rani abanda.’ Ono aYisaraere aagianga pai te. I aaida ka imo Yosua na Kareba!

Ginipai Yekova amangihe? Ko aya fu Moize: ‘Na agu apai dunduko mi namangihe fu aYisaraere re, i aidanga ka giasangba re te. I nika raka ku rogo gi ngbakungbo re tipa agarã 40, na ki kpiki ku ane. Kina awiriyo na Yosua gbiati Kareba nika raka rogo gu ringara mi akidohe tipa ka fuhe fuyo.’