Israelitas bireʼyibu dainy Sinaí né goyeeyibu ló yoovich xtuny Parán né bidxinyibu toib lagary ni góc laa Qadés. Órni goyoʼyibu cú Jehová gochbu Moisés: «Bixel 12 buñguieeu tzaláach layoo ni guidudi lóoto ni noʼ gudx Canaán. Bixel toib buñguieeu por tigaaga family». Ór cú Moisés golú 12 buñguieeu né goniʼbu: «Coltzé Canaán né coltzaláach pal buen yoo láani. Láaca colguibiʼ pal nadip guirá buñ ni rabés lagarycu o yaca, pal rabésyibu lainy yoʼ lairy o pal rabésyibu lainy gudxrop». 12 buñguieeu goyeeyibu Canaán, né ladyibu goyoʼ Josué né Caleb.

Godudy 40 dzú, bibiguetyibu ronoʼ Moisés. Né bitnéyibu higos, granad né balach, né goniʼyibu: «Layoo xtuny Canaán nacni buen yoo, per buñ ni rabés cú nacyibu por buñ nadip né roloo xcudxyibu napni muros nasoʼdii». Ór cú Caleb goniʼ: «¡Labúu sonyno gan layibu! Coltzoʼ nimaca». ¿Xpensarylo xigony goniʼ Caleb scú? Portín gopbu confianz lóo Jehová. Per stipnés ni goyee né layibu goniʼ: «Yaca, diti tzoʼno. Buñ de lagarycu nacyibu buñ nadip né nigolú nasoʼyibu. Pal nasagaʼno cueʼyibu, ñenno xomod goxar».

Israelitas nimaca bireʼgan, né goniʼyibu mal de Moisés né gochyibu saʼyibu: «Guiyopyno stoib ni guisanir nislóno né  guibiguetno Egipto. ¿Xí tzagunyno Canaán? ¿Nosi tzoʼno par guigaityibu lóono la?». Josué né Caleb góoch layibu: «Más galán guisobdiitzno Jehová. Láabu salaabu lóono. Diti guidzuibyto». Per israelitas diti goloʼyibu cuent. ¡Xalagary ngú náyibu nagaityibu Josué né Caleb!

¿Xí buny Jehová ór cú? Gochbu Moisés: «Ma buni xidal cós por israelitas, per diti náyibu guisobdiitzyibu naʼ. Por ngú sasaayibu ló yoovich reʼ 40 íz dada gaityibu. Nosi xiinyibu, Josué né Caleb sabanyibu ló layoo ni goniya guidudi israelitas».