Nindo moko kinde ma nyithindho mir Israel gibino i langa, Kora, Dathan, Abiram, man dhanu 250 gigam gijai ni Musa gikud Harun. Giyero igi kumae: ‘Wudaru sagu wiwa! Pirang’o ikethiri ni jatelwic mwa man Harun ke ni jalam ma dit? Yehova tie Mungu mwa ceke, etie ngo mwu wukud Harun kende.’ Lembe maeno ma gitimo ufoyo ngo i Yehova. I wang’ Yehova, ebino ve gijai ire en!

Musa uyero ni Kora man ni dhanu ma gibino cwake kumae: ‘Urwo wubin i bang’ hema mi cokiri ku tabu mwu, wuketh mac i ie man udok ma ng’wice ng’ar i wie. Yehova binyutho iwa ng’atu m’eng’io.’

Urwone, Kora man dhanu 250 gicidh girombo ku Musa i bang’ hema mi cokiri. Kinde ma gituc kuca, giwok gicaku wang’u udok ma ng’wice ng’ar i wang’ Yehova calu ve gin de gibino julam. Yehova uyero ni Musa gikud Harun kumae: ‘Wukoyuru cen ku Kora man dhanu pare.’

Kadok nwang’u Kora uyio nicidho i bang’ Musa kaka ma hema mi cokiri ni ie de, ento Dathan, Abiram man juruot migi  gikwero nicidho. Yehova uyero ni nyithindho mir Israel nia giai cen kud i kum hema pa Kora, Dathan, man Abiram. E ndhu ndhu nica, nyithindho mir Israel gikoyiri cen. Ento Dathan, Abiram, man juruot migi gicungo i kum hema migi. Mbwang’ kumeni ng’om ugam ukak dra man umwonyogi cen! I hema mi kacokiri lundo, mac uai i polo man uwang’u Kora ku dhanu 250 m’ubino cwake.

Yehova uyero ni Musa kumae: ‘Gam uluth mi jutelwic ceke mi suru mir Israel, man kiew nyinggi i wie. Ento iwi uluth mi suru pa Lawi, kiew nying’ Harun. Kethgi i hema mi cokiri, man uluth pa ng’atu m’ang’io bithiwo.’

Urwone, Musa ugam uwodho uluthne ceke woko man enyuthogi ni jutelwic mir Israel. Uluth pa Harun uthiwo man ecego akpalakpala (pensi) m’ubogre ngbo i kume. I ayi maeno re ma Yehova unyutho nia eng’io Harun ubed jalam ma dit.