Mbus ngim ngéda, mu kiki bon ba Israel ba bé i ñoñ, Kôra, Datan, Abiram, ni 250 i bôt ipe i bi telep i kolba Môsé. Ba kal nye le: ‘Di nwaa we! Inyuki wen u nlama ba ñane wés, ni Arôn, prisi keñi? Yéhôva a yé lôñni bés bobasôna, ha ndigi ni we lôñni Arôn bé.’ Yéhôva a bé bé maséé, a bi yoñ hala wengoñle nyen ba nkolba!

Môsé a bi kal Kôra lôñni bôt ba bé i pes yé le: ‘Lona yani i Lap, ni lona biyôñôl bi hié binan nyonok ni binjinjiñ. Yéhôva a ga unda bés njee a ntep.’

Hilo hi bé noñ, Kôra ni 250 i bôlôm i lo i boma Môsé i Lap. Nyoo, ba ligis binjinjiñ kiki biprisi. Yéhôva a kal Môsé bo Arôn le: ‘Ni bagla ni Kôra ni bôt bé.’

To lakii Kôra a bi lo i boma Môsé i Lap, Datan, Abiram ni mahaa map ba bi tjél lo. Jon, Yéhôva a bi kal bon ba Israel le ba ke haa ni mandap ma mabadô ma Kôra, Datan ni Abiram. Kunda yada, bon ba Israel ba nyodi bo ipañ. Datan, Abiram ni  mahaa map ba telep bisu bi mandap map ma mabadô. Ha nyen hisi hi bi yibla, hi mil bo tjwat! Nyoo i Lap, hié hi bi lôl i ngii, hi ligis Kôra ni 250 i bôlôm ba ba ni nye.

Yéhôva a bi kal Môsé le: ‘Yoñ ntoñgo u hiki ñane litén, u tila ki jôl jé mu. Ndi tila jôl li Arôn mu ntoñgo u litén li Lôk Lévi. Ha mintoñgo mi ikété Lap. Nu mut ntoñgo wé u ño mbônji, wee nyen me mpohol.’

Hilo hi bé noñ, Môsé a pémés mintoñgo nwomisôna, a unda nwo baane ba matén. Ntoñgo u Arôn u bi o mbônji, u num yak matam ma ent i nkana. Hala nyen Yéhôva a bi unda le Arôn nyen a yé mpohlak kiki prisi keñi.