Tingki i, di padang belantara dope halak Israel. Mangalo do si Kora, si Datan, si Abiram, dohot 250 halak tu si Musa. Didok nasida ma tu si Musa, ‘Boasa ingkon ho na memimpin hami jala boasa si Aron na gabe sintua ni malim? Ndang holan hamu na didongani Jahowa, hami pe didongani do.’ Ndang lomo roha ni Jahowa dibahen nasida songon i. Dos do i na mangalo tu Ibana!

Didok si Musa ma tu si Kora dohot tu na mangihuthon ibana, ‘Marsogot, ro ma hamu tu tabernakel. Boan ma dupa asa dipatudu Jahowa ise na dipillit.’

Marsogotna i, ro ma si Kora dohot 250 halak manjumpangi si Musa di tabernakel. Ditutung nasida ma dupa songon na dibahen angka malim. Didok Jahowa ma tu si Musa dohot tu si Aron, ‘Mandao ma hamu sian si Kora dohot angka donganna.’

Ro do si Kora tu tabernakel. Alai, ndang olo si Datan, si Abiram dohot keluarga ni nasida ro tusi. Disuru Jahowa ma halak Israel asa mandao sian kemah ni si Kora, si Datan dohot si Abiram.  Alani i, mandao ma nasida. Di tingki i, jongjong do si Datan, si Abiram dohot keluarga ni nasida di luar ni kemah i. Tompu ma bola dua tano i jala dibondut ma nasida! Ro ma muse api tu tabernakel. Ditutung ma si Kora dohot na 250 halak i.

Dung i didok Jahowa ma tu si Musa, ‘Buat ma tungkot ni ganup pemimpin marga. Surathon ma goar ni nasida disi. Alai di tungkot ni marga Lepi, surat ma goar ni si Aron. Peakkon ma sude tungkot i di tabernakel. Tungkot ni ise na marbunga, ibana ma na hupillit.’

Marsogotna i, dipakaluar si Musa ma sude tungkot i. Dipatudu ma i tu sude pemimpin. Holan tungkot ni si Aron do na marbunga jala marparbue. On patuduhon nunga dipillit Jahowa si Aron gabe sintua ni malim.