Paghaloy-haloy, kan an mga Israelita nasa kaawagan, nagrebelde ki Moises saka Aaron si Kora, Datan, Abiram, asin an 250 lalaki. Sinabi ninda sa duwang ini: ‘Sobra na an ginigibo nindo! Taano ta dapat na ika an magin lider mi saka si Aaron an magin halangkaw na saserdote? Nasa kaibanan ta gabos si Jehova, bako sanang saindo ni Aaron.’ Dai iyan nagustuhan ni Jehova. Sa paghiling niya, pagrebelde iyan sa saiya!

Sinabihan ni Moises si Kora asin an mga suportador kaini: ‘Magduman kamo sa aga sa tabernakulo, tapos magdara kamo nin tigsararong bugtakan nin kalayo na pano nin insenso. Ipapahiling ni Jehova sa sato kun siisay an pinili niya.’

Kinaagahan, si Kora asin an 250 lalaki nagduman ki Moises sa tabernakulo. Nagtutong sinda duman nin insenso na garo sinda mga saserdote. Sinabi ni Jehova ki Moises saka Aaron: ‘Rumayo kamo ki Kora asin sa mga kaibanan kaini.’

Dai nag-iba ki Kora si Datan, Abiram, saka an mga pamilya kaini sa pagduman ki Moises sa tabernakulo. Sinabihan ni Jehova an mga Israelita na rumayo sa mga tolda ni Kora, Datan, asin Abiram. Dali-daling nagrayo an mga Israelita. Nasa may luwas kan mga tolda  ninda si Datan, Abiram, asin an saindang mga pamilya. Bigla na sanang buminuka an daga dangan hinalon sinda! Sa may tabernakulo, may kalayong buminaba hali sa langit tapos tinunaw si Kora pati an 250 kairibanan kaini.

Dangan sinabi ni Jehova ki Moises: ‘Kumua ka nin sarong sugkod sa kada lider kan tribo, asin isurat mo an pangaran kan kada saro sa sadiri niyang sugkod. Pero sa sugkod na hali sa tribo nin Levi, isurat mo an pangaran ni Aaron. Ilaog mo an mga iyan sa tabernakulo, asin mamumurak an sugkod kan lalaki na sakuyang pinili.’

Kan sunod na aldaw, ilinuwas ni Moises su gabos na sugkod asin ipinahiling iyan sa mga lider. Namurak an sugkod ni Aaron asin igwa iyan nin mga hinog na almendras. Pinatunayan ni Jehova sa paaging ini na si Aaron an pinili niyang magin halangkaw na saserdote.