Ilyo abena Israele baali mu matololo, Kora, Datani, Abiramu, pamo na bantu 250 balyalukiile Mose. Bamwebele abati: ‘Tatulekufwaya. Cinshi ulingile ukubela intungulushi yesu e lyo Aarone na o aba shimapepo mukalamba? Bonse tuli bantu ba kwa Yehova, te imwe fye mweka.’ Yehova tatemenwe ifi bacitile. Alemona ukuti e o bapondokele!

Mose aebele Kora na abo ali nabo ati: ‘Mailo mukese ku cikuulwa ca mushilo, mukalete ififutumwino mukabikemo ne fyanunkila. Yehova akatulanga umuntu uo asala.’

Ubushiku bwakonkelepo Kora na abaume 250 baliile ku cikuulwa ca mushilo ukwali Mose. Ilyo bali pa cikuulwa ca mushilo balyocele ifyanunkila kwati nabo bali ni bashimapepo. Lyena Yehova aebele Mose na Aarone ati: ‘Fumeni ukuli Kora na bantu bakwe.’

Nangu ca kuti Kora na Mose baalile ku cikuulwa ca mushilo, Datani, Abiramu ne ndupwa shabo bena balikeene ukuyako. Yehova aebele abena Israele ukutaluka ku matenti ya kwa Kora, Datani na Abiramu. Bwangu bwangu abena Israele balicitile ifyo Yehova abebele. Datani, Abiramu ne ndupwa  shabo baiminine ku nse ya matenti yabo. Ilyo line fye umushili walilepwike no kubamina! Kabili umulilo walifumine ku muulu no koca Kora na baume 250 abo ali nabo pa cikuulwa ca mushilo.

Lyena Yehova aebele Mose ati: ‘Poka inkonto ku ntungulushi sha mikowa yonse, kabili pa nkonto imo imo ulembepo ishina lya ntungulushi ukufumine iyo nkonto. Lelo pa nkonto ya mukowa wa kwa Lebi pena ulembepo ishina lya kwa Aarone. Ubike ishi nkonto mu cikuulwa ca mushilo, kabili inkonto ya muntu iikabalula amaluba ninshi e o nasala.’

Ubushiku bwakonkelepo, Mose alifumishe nkonto no kulanga intungulushi. Inkonto ya kwa Aarone yalibalwile amaluba kabili kwali ama almonde ayapya. Ifi Yehova acitile alangile ukuti asalile Aarone ukuba shimapepo mukalamba.