Wagati dɔ la, ka Israɛldenw to kongokolon kɔnɔ, Kore, Datan, Abiramu ani mɔgɔ 250 murutira Musa ma. U y’a fɔ a ye ko: ‘I ta tɛmɛna a daan kan! Mun na i b’i yɛrɛ bila an kun na ani Arɔn be kɛ sarakalasebagaw kun na? Jehova be ni an bɛɛ ye, ele ni Arɔn dɔrɔn tɛ.’ O ma diya Jehova ye. A y’a jaati k’u be murutira ale lo ma!

Musa y’a fɔ Kore n’a ka mɔgɔw ye ko: ‘ A’ ye aw ka wusulandagaw fa wusulan na ka na fanibugu la sini. Jehova ye mɔgɔ min sugandi, a bena o tigi yira an na.’

O dugusagwɛ, Kore ni mɔgɔ 250 nunu ni Musa ye ɲɔgɔn sɔrɔ fanibugu la. U ye wusulan jɛni i n’a fɔ u tun ye sarakalasebagaw ye. Jehova y’a fɔ Musa ni Arɔn ye ko: ‘ A’ ye bɔ Kore n’a ka mɔgɔw kɔrɔ.’

Kore tagara Musa fɛ fanibugu la. Nka, Datan ani Abiramu n’u somɔgɔw banna ka taga. Jehova y’a fɔ Israɛldenw ye ko u ka bɔ Kore, Datan ani Abiramu ka fanibuguw kɔrɔ. Israɛldenw sinna ka bɔ yen. Datan, Abiramu n’u somɔgɔw bɔra ka lɔ u ka  fanibuguw kɔrɔ. Dugukolo barila ka dayɛlɛ ani k’u datugu! Fanibugu yɔrɔ la, tasuma jigira ka Kore n’a ka mɔgɔ 250 jɛni.

Jehova y’a fɔ Musa ye ko: ‘Bere minɛ Israɛl bɔnsɔn kelen kelen bɛɛ ɲɛmɔgɔ fɛ ani bɛɛ tɔgɔ sɛbɛ a ka bere kan. Nka Arɔn tɔgɔ sɛbɛ Levi bɔnsɔn ka bere kan. O berew bila fanibugu kɔnɔ. Ne ye mɔgɔ min sugandi, filɛruw bena falen o tigi ka bere kan.’

O dugusagwɛ, Musa bɔra ni berew bɛɛ ye k’u yira Israɛl bɔnsɔnw ka ɲɛmɔgɔw la. Arɔn ka bere ye filɛruw bɔ ka amandiyiridenw kɛ fɔɔ ka mɔ. O cogo la, Jehova y’a yira ka gwɛ ko a ye Arɔn lo sugandi k’a kɛ sarakalasebagaw kuntigi ye.