Umi israelita oĩ aja gueteri pe desiértope, Coré, Datán, Abiram ha 250 kuimbaʼe opuʼã Moisés kóntrape ha heʼi: “¡Orekueráima pendehegui! ¿Mbaʼére guaʼu ndénte la oremoakã vaʼerã? ¿Ha mbaʼére guaʼu avei Aarónte la saserdóte prinsipál? Ndahaʼéi ningo penendive añónte la Jehová oĩva, haʼe oĩ avei orendive”. Jehovápe ndogustái umi kuimbaʼe heʼíva ha heʼi haʼekuéra opuʼãha hína hese voi ojapóvo upéicha.

Moisés heʼi Coré ha iñirũnguérape: “Peju koʼẽrõ pe tavernákulope ha pegueru umi mbaʼyru ojehapyha insiénso ha avei pe insiénso. Jehová oikuaaukáta ñandéve mávapepa haʼe oiporavo”.

Al día sigiénte, Coré ha umi 250 kuimbaʼe oho Moisés rendápe pe tavernákulope ha oñemoĩ ohapy hikuái pe insiénso haʼerõguáicha saserdóte. Upévare Jehová heʼi Moisés ha Aarónpe: “Pejeaparta koʼã kuimbaʼégui”.

Coré oho kuri pe tavernákulope Moisés rendápe, péro Datán, Abiram ha ihentekuéra ndohoséi kuri hendive. Upéi Jehová heʼi umi israelítape: “¡Pejeíke Coré, Datán ha Abiram róga ypýgui!”. Upepete umi hénte ojei ijypyguikuéra. Datán ha Abiram katu osẽ oñemboʼy hóga entrádape ha hendivekuéra hembireko ha ifamiliakuéra. Upeichaháguinte pe yvy ojeka ha omokõmbaite chupekuéra. Upéi ou peteĩ tatarendy yvágagui ha ojuka Coré ha umi 250 kuimbaʼe oĩvape pe tavernákulo entrádape.

 Upéi Jehová heʼi Moiséspe: “Ere umi omoakãvape káda trívu togueru ndéve ivastón, ha eskrivi káda uno réra pe ivastónre. Péro remoĩ vaʼerã Aarón réra pe vastón orrepresentávare Leví trívupe. Upéi emoĩ umi vastón pe tavernákulope, ha pe kuimbaʼe che aiporavóva vastón ipotýta”.

Al día sigiénte, Moisés oho onohẽ umi vastón pe tavernákulogui ha ohechauka umi omoakãvape umi trívu. Enterovénte ohecha mbaʼéichapa Aarón vastón ipotypa ha oreko voi heta alméndra hiʼajupámava. Péicha Jehová ohechauka porã chupekuéra haʼe voi oiporavo hague Aarónpe oservi hag̃ua kómo saserdóte prinsipál.