Thaum cov Yixayee nyob hauv tebchaws moj sab qhua tau ib ntus lawm, Khaula, Dathas, Anpilas, thiab 250 leej txawm sawv tawm tsam Mauxe. Lawv hais rau Mauxe tias: ‘Neb ua dhau cai lawm. Vim li cas koj ho ua peb tus thawj thiab Aloo ho yog tus pov thawj hlob? Yehauvas yeej nrog nraim peb thiab tsis yog neb xwb.’ Yehauvas suav tias qhov uas lawv fav xeeb Mauxe li ntawd, yeej yog lawv fav xeeb rau Yehauvas thiab ntag!

Mauxe hais rau Khaula thiab cov uas nrog nws tias: ‘Tagkis, nej cia li tuaj ua ke rau ntawm lub tsev ntaub. Cia txhua tus nyias nqa nyias lub yias rau ncaig taws thiab muab hmoov tshuaj tsw qab tso rau hauv. Cia Yehauvas mam xaiv seb nws pom zoo leejtwg.’

Hnub tom qab, Khaula thiab 250 leej thiaj tuaj ntsib Mauxe ntawm lub tsev ntaub sib ntsib. Lawv hlawv hmoov tshuaj tsw qab ib yam li tus pov thawj ib txwm hlawv. Yehauvas hais rau Mauxe thiab Aloo tias: ‘Cia li txav deb ntawm Khaula thiab cov neeg no.’

Khaula nrog Mauxe mus rau ntawm lub tsev ntaub sib ntsib. Tiamsis Dathas, Anpilas, thiab nkawd tsev neeg tsis kam nrog nkawd mus. Yehauvas hais kom cov Yixayee cia li txav deb ntawm Khaula, Dathas, thiab Anpilas tej tsev ntaub. Cov Yixayee thiaj txav  kiag tamsid. Thaum Dathas, Anpilas, thiab nkawd tsev neeg tseem sawv ntawm lawv tej tsev ntaub, ces av txawm qheb plho nqos kiag lawv mus lawm! Ntawm lub tsev ntaub sib ntsib, Yehauvas tso hluav taws los hlawv Khaula thiab 250 leej tuag tas tibsi.

Yehauvas hais rau Mauxe tias: ‘Cov thawj coj ntawm txhua xeem, hais kom nyias nqa nyias tus pas nrig tuaj. Nyias sau nyias lub npe rau ntawm tus pas nrig. Xeem Levi tus pas nrig, yuav tsum sau Aloo lub npe. Muab cov pas nrig tso rau hauv lub tsev ntaub sib ntsib. Tus uas kuv xaiv lawd nws tus pas nrig yuav hlav tawg paj.’

Hnub tom qab, Mauxe txawm nqa cov pas nrig tuaj rau cov thawj coj saib. Lawv pom tias Aloo tus pas nrig thiaj tawg paj thiab txi txiv duaj deg xwb. Zaum no sawvdaws thiaj paub lawm tias Aloo yog tus uas Yehauvas tau xaiv los ua tus pov thawj hlob.