Kombunda yoruveze Ovaisrael ngunda ave ri mokuti onguza, Korak, Datan, Abiram novakwao varwe 250 va pirukira Moses. Owo ve mu raera kutja, ‘Eṱe twa urwa naove! Ongwaye ove tji mo sokurira omunane wetu na Aron tji ma sokurira omupristeri omunene? Jehova u ri puna eṱe atuhe wina, keri puna ove na Aron uriri.’ Jehova kari nohange notjiṋa hi. Eye ee tji vara tjimuna mave mu pirukire!

Moses wa raera Korak novemukongorere na tja: ‘Indjeye kondanda yomerikotameneno muhuka nu eterereye ovikangero vyomatwimisiro mu mwa tuwa ovyomoro omuwa. Jehova me tu raisire kutja ouṋe ngwa toorora.’

Eyuva nda kongorera ko, Korak novarumendu 250 va ya okukahakaena kuna Moses pondanda yomerikotameneno. Imbo va katwimisa ovyomoro omuwa tjimuna vari ovapristeri. Jehova wa raera Moses na Aron a tja: ‘Humburukeye kokure na Korak novemukongorere.’

Nandarire kutja Korak wa ya ku Moses kondanda yomerikotameneno, Datan, Abiram nomaṱunḓu wawo va panḓa  okuyenda ngo. Jehova wa raera Ovaisrael okuhumburuka kokure nozondanda zaKorak, Datan na Abiram. Tjimanga Ovaisrael va humburuka. Datan, Abiram nomaṱunḓu wawo va kurama pendje yozondanda zawo. Tjimanga ehi ra paturuka nari ve ṋiṋa! Ngunda ave ri pondanda yomerikotameneno, kwa rauka omuriro okuza keyuru nau nyosa Korak novemukongorere 250.

Jehova wa raera Moses na tja: ‘Kambura okati okuza komunane womuhoko auhe, nu u tjange ena re ku ko. Posiya kokati komuhoko waLevi tjanga ko ena raAron. Twa moukoto wondanda yomerikotameneno, nu kokati komurumendu ngu me toorora maku hapa ovimbloma.’

Meyuva nda kongorera ko, Moses wa eta outi auhe neu raisa kovanane. Kokati kaAron kwa hapere ovimbloma novihape. Momuano mbwi Jehova wa raisa kutja eye wa toorora Aron kutja ma rire omupristeri omunene.