Bisi sekali, lebuh orang Israel ba menua puang, Korah, Datan, Abiram enggau 250 iku orang ke bukai angkat ngelaban Moses. Sida madah ngagai Moses: ‘Seduai nyau kelalu! Nama kebuah nuan patut nyadi tuai kami lalu Aron nyadi imam besai? Jehovah bisi enggau semua kitai ukai semina nuan enggau Aron.’ Jehovah enggai meda nya. Iya ngumbai tu pengawa ngelaban Iya!

Moses madah ngagai Korah enggau orang ke nyukung iya: ‘Datai ngagai langkau sembiang pagila, lalu bai sarang menyan penuh enggau menyan. Jehovah deka nunjukka kitai sapa ke udah dipilih Iya.’

Ba hari siti, Korah enggau 250 iku orang iya betemu enggau Moses ba langkau sembiang. Dia, sida nunu menyan baka imam. Jehovah madahka Moses enggau Aron: ‘Seraraka diri ari Korah enggau orang iya.’

Taja pan Korah mupuk ngagai Moses ba langkau sembiang, Datan, Abiram enggau ruang bilik sida enda enggau iya. Jehovah ngasuh orang Israel anang semak enggau langkau kain Korah, Datan enggau Abiram. Enggau jampat orang Israel mindah ke bukai. Datan, Abiram enggau ruang bilik sida bediri ba luar langkau  kain sida. Tekala nya, tanah merekah lalu nelan sida! Ba langkau sembiang, api nurun lalu nunu Korah enggau 250 iku orang iya.

Jehovah lalu madah ngagai Moses: ‘Ambi tungkat ari tuai tiap raban lalu tulis nama iya ba tungkat nya. Tang ba tungkat raban Lewi, tuliska nama Aron. Engkahka semua tungkat nya ba dalam langkau sembiang, lalu tungkat orang ke dipilih Aku deka bebungai.’

Ba hari siti, Moses mansutka semua tungkat lalu nunjukka ngagai bala tuai raban. Tungkat Aron bebungai, lalu bisi buah almon ti mansau. Enggau chara tu, Jehovah nunjukka Iya udah milih Aron nyadi imam besai.