Israela ni nam mali hta nga taw ai laman Kora, Dahtan, Abira hte kaga marai 250 gaw Mawshe hpe ninghkap nna gumlau wa ma ai. Shanhte gaw Mawshe hpe: ‘Anhte matut nna n lu hkap la sai. Hpa majaw nang gaw anhte a ningbaw rai nga nna, Arun gaw hkinjawng agyi rai nga a ta? Anhte yawng hte mung Yehowa arau nga ai, nang hte Arun hta sha nga ai n re’ nga nna tsun ma ai. Dai hpe Yehowa n ra sharawng ai. Dai hku galaw ai gaw shi hpe ninghkap nna gumlau ai ngu Yehowa mu mada ai.

Mawshe gaw Kora hte shi hpe madi shadaw ai ni hpe: ‘Hpawt de wan ban hta manam pyaw ai baw bang nna nawku sum de sa wa mu. Yehowa kadai hpe lata ai lam anhte hpe madun dan na re’ nga nna tsun ai.

Hpang shani hta, Kora hte marai 250 gaw Mawshe hte hkrum na matu nawku sum de sa wa ma ai. Shanhte gaw hkinjawng agyi ni sha galaw ra ai manam pyaw ai baw nat nawng ma ai. Yehowa gaw Mawshe yan Arun hpe: ‘Kora hte shi a masha ni hte kaga san san nga mu’ nga nna tsun ai.

Kora gaw Mawshe nga ai nawku sum de sa mat ai. Dahtan, Abira hte shanhte a nta masha ni gaw n sa ma ai. Yehowa gaw Israela ni hpe Kora, Dahtan hte Abira ni a sum ni hte tsan tsan nga na matu tsun ai. Israela ni mung kalang ta dai shara kaw nna tsan tsan de sa mat ma ai. Dahtan, Abira hte shanhte a nta masha ni gaw shanhte a sum shinggan hta tsap  taw ma ai. A kajawng sha aga ga mat nna shanhte hpe ma-yu kau ai. Nawku sum hta gaw, lamu kaw nna wan hkrat wa nna Kora hte shi a masha 250 hpe hkru kau ai.

Yehowa gaw Mawshe hpe ndai hku tsun ai: ‘Amyu lakung langai hpra na du agyi langai hpra a daw hkrawng hpe la nna, dai hta shi a amying ka da u. Lewi amyu a daw hkrawng hta gaw Arun a amying ka shakap u. Dai daw hkrawng yawng hpe nawku sum hta bang da u. Ngai lata ai wa a daw hkrawng hta apu pu taw na re.’

Hpang shani hta, Mawshe mung daw hkrawng yawng hpe la sa wa nna du agyi ni hpe madun dan ai. Arun a daw hkrawng hta apu pu nna batan si ni mung myin taw nga ai. Ndai lam hku nna, Yehowa gaw Arun hpe hkinjawng agyi hku nna lata ai lam sakse madun wa ai.