KPƐLƖKƲƲ 27
Pakʋyɩ Yehowa yɔɔ
Izrayɛɛlɩ piya wɛ kañɩmbusuu taa nɛ pɩla alɩwaatʋ pazɩ lɛ, Kora, Dataŋ, Abiram nɛ ɛyaa 250 waa nabɛyɛ kʋyɩ Moyizi yɔɔ. Peheyi-i se : ‘Ñɔ-tɔm nɩ-ɖʋ. Ɛbɛ yɔɔ pɩwɛɛ se ŋkɛ ɖa-ñʋʋdʋ nɛ Aarɔɔnɩ kɛ cɔjɔ sɔsɔ? Pɩtɩkɛ mi-ɖeke Yehowa wazɩɣ, ɛwazɩɣ ɖa-tɩŋa.’ Pa-lakasɩ nzɩ, sɩtɩkɛdɩnɩ Yehowa. Ɛ-lɩmaɣza taa lɛ, ɛ-maɣmaɣ ɛ-yɔɔ ɛyaa mba pakʋyaa.
Moyizi heyi Kora nɛ mba payɩ patɩŋaɣ ɛ-wayɩ yɔ se: ‘Cee lɛ, ɩɖɔkɩ mɩ-ñanzɩ nzɩ sɩ-taa pañaɣzɩɣ sɔzɩŋ num yɔ nɛ ɩkɔɔ Ɛsɔ sɛtʋ kizinziku tɛɛ. Yehowa kaɣ-ɖʋ wɩlʋʋ mba ɛlɩzaa yɔ.’
Tɛʋ fema lɛ, Kora nɛ ɛyaa 250 powolo pakatɩ Moyizi, kizinziku tɛɛ. Kora nɛ ɛ-ɛyaa paawɛɛ nɛ pañaɣzɩɣ sɔzɩŋ num ɛzɩ mba kɛnɩ cɔjɔnaa yɔ. Yehowa heyi Moyizi nɛ Aarɔɔnɩ se: ‘Iposi mɩ-tɩ nɛ Kora nɛ ɛ-ɛyaa.’
Paa Kora kaawoba nɛ ɛkatɩ Moyizi yɔ, Dataŋ, Abiram nɛ pɔ-hɔŋ taa ñɩma paba ñekizaa se paawoki. Yehowa heyi Izrayɛɛlɩ piya se sɩtaañɔtɩnɩ Kora, Dataŋ nɛ Abiram pe-kizinzikiŋ. Peeɖe peeɖe lɛ, Izrayɛɛlɩ piya kɛzɩ sɩ-tɩ hɔɔlʋʋ.
Dataŋ, Abiram nɛ pɔ-hɔŋ taa ñɩma paasɩŋ pe-kizinzikiŋ nɔnɔsɩ taa. Peeɖe lɛ, tɛtʋ tɩŋ tɩfaɣ nɛ tilibi-wɛ. Nɛ Kora nɛ ɛ-ɛyaa 250 waa mba paawɛ Ɛsɔ sɛtʋ kizinziku cɔlɔ yɔ? Miŋ nɩɩyɩ lɩnɩ ɛsɔdaa nɛ ɩñaɣ pa-tɩŋa.Pʋwayɩ lɛ, Yehowa heyi Moyizi se: ‘Kpaɣ paa cejewiye nɖɩ lɛ ɖɩ-ñʋʋdʋ ɖaʋ nɛ ŋma kɩ-yɔɔ ɛ-hɩɖɛ. Ma Aarɔɔnɩ hɩɖɛ Leevi mba ɖaʋ yɔɔ. Woni ɖaŋ ɛnɩ nɛ ŋsɩɩ kizinziku tɛɛ, nɛ weyi malɩzɩɣ yɔ, ɛ-ɖaʋ yɔɔ hɛtʋ kaɣ lɩʋ.’
Tɛʋ fema lɛ, Moyizi lɩnɩ ɖaŋ ɛnɩ ɩ-tɩŋa nɛ ɛwɩlɩ cejewe ñʋndɩnaa. Aarɔɔnɩ ɖaʋ yɔɔ nɛ hɛtʋ. Yehowa tɩŋnɩ nʋmɔʋ ŋgʋ kɩ-yɔɔ nɛ ɛwɩlɩ kpayɩ kpayɩ se Aarɔɔnɩ ɛlɩzaa se ɛkɛ cɔjɔ sɔsɔ.
“Ɩña mɩ-ñʋndɩnaa nɛ ɩnɩɩnɩ-wɛ.” —Ebree 13:17