Hĩndĩ ĩmwe Aisiraeli marĩ werũ-inĩ, Kora, Dathani, Abiramu, na andũ angĩ 250 nĩ maaremeire Musa. Maamwĩrire ũũ: ‘Nĩ kĩĩ gĩtũmaga mwĩĩkĩrĩre! Wĩtuaga mũnene witũ nĩkĩ nake Haruni agetua mũthĩnjĩri-Ngai mũnene? Jehova arĩ hamwe na ithuĩ ithuothe, to we na Haruni tu.’ Jehova ndaakenirio nĩ ũndũ ũcio. Onire ta arĩ we maaremagĩra.

Musa eerire Kora hamwe na andũ acio ũũ: ‘Rũciũ mũgoka hema-inĩ ya gũtũnganwo mũrĩ na ngĩo cianyu cia gwĩkĩrũo mwaki ciyũrĩte ũbumba. Jehova nĩ akonania nũ athurĩte atongorie.’

Mũthenya ũrĩa warũmĩrĩire, Kora na andũ acio angĩ 250 nĩ maathire gũcemania na Musa hema-inĩ ya gũtũnganwo. Nĩ maacinĩire Jehova ũbumba marĩ kũu thĩinĩ, no wĩra ũcio warutagwo nĩ athĩnjĩri-Ngai. Jehova eerire Musa na Haruni ũũ: ‘Eherai harĩ Kora na andũ acio.’

O na gũtuĩka Kora nĩ aathire kũrĩ Musa hema-inĩ ya gũtũnganwo, Dathani, Abiramu, na famĩlĩ ciao nĩ maaregire gũthiĩ. Jehova nĩ eerire Aisiraeli mehere hema-inĩ cia Kora, Dathani, na Abiramu. Nao Aisiraeli makĩehera o na ihenya.  Dathani, Abiramu, na famĩlĩ ciao maarũgamire nja ya hema ciao. Thĩ yacokire ĩgĩatũka o rĩmwe na ĩkĩmameria. Nakuo hema-inĩ ya gũtũnganwo, mwaki nĩ woimire igũrũ na ũgĩcina Kora na andũ 250 arĩa maarĩ hamwe nake.

Jehova aacokire akĩra Musa ũũ: ‘Oya thanju ciothe cia atongoria a mĩhĩrĩga yothe ya Aisiraeli na ũciandĩke marĩĩtwa mao. No rũthanju-inĩ rwa mũhĩrĩga wa Lawii, wandĩke rĩĩtwa rĩa Haruni. Ũcoke ũciige thĩinĩ wa hema ya gũtũnganwo, na rũthanju rwa mũndũ ũrĩa ngũthuura nĩ rũkũmera mahũa.’

Mũthenya ũyũ ũngĩ Musa nĩ aarutire thanju icio ciothe na agĩcionia atongoria acio. Rũthanju rwa Haruni rwarĩ na mahũa maakũraga na matunda meru ma mĩrothi. Kũgerera njĩra ĩyo Jehova nĩ onanirie atĩ nĩ aathurĩte Haruni atuĩke mũthĩnjĩri-Ngai mũnene.