တၢ်မၤလိ ၂၇
အဝဲသ့ၣ်ထီဒါယဟိဝၤယွၤ
ဖဲပှၤအံၣ်စရ့လးဖိတဖၣ် အိၣ်လၢပှၢ်မုၢ်ကနၢအခါ စီၤကိၤရး, စီၤဒၤသၣ်, စီၤအဘံရၣ်ဒီးအပှၤအဂၤ ၂၅၀ န့ၣ်ထီဒါဝဲစီၤမိၤၡ့လီၤ. အဝဲသ့ၣ်တဲဘၣ်စီၤမိၤၡ့လၢ– ‘ပမၤဃုာ်နၤတကဲလၢၤဘၣ်. ဘၣ်မနုၤအဃိ နဘၣ်ကဲပခိၣ်ဒီးစီၤအၤဟရိၣ် ဘၣ်ကဲပှၤလုၢ်တၢ်အခိၣ်လဲၣ်. ကစၢ်ယွၤတအိၣ်ဒီးသုထဲခံဂၤဧိၤဘၣ်. ယဟိဝၤယွၤ အိၣ်ဒီးပဝဲဒၣ်ခဲလၢာ်လီၤ.’ လၢတၢ်ဂ့ၢ်အံၤအဃိ ယဟိဝၤယွၤ အသးတမုာ်ဘၣ်. ကစၢ်ယွၤထံၣ်အဝဲသ့ၣ်ဒ် ပှၤလၢအထီဒါအီၤလီၤ.
စီၤမိၤၡ့ တဲဘၣ်စီၤကိၤရးဒီးအပှၤတဖၣ်လၢ– ‘ခဲမုၢ်ဆ့ၣ်န့ၣ် ဟဲလၢဒဲစီဆှံဒီးဟဲစိာ်ဃုာ်ဒီး သုသပၢၤမ့ၣ်အူတက့ၢ်. ဒီးပှၤလၢယဟိဝၤယွၤ ဘၣ်အသးန့ၣ်အဝဲကပာ်ဖျါထီၣ်န့ၢ်ပှၤလီၤ.’
လၢခံတနံၤန့ၣ် စီၤကိၤရးဒီးအပှၤ ၂၅၀ လဲၤထံၣ်လိာ်အသးဒီးစီၤမိၤၡ့လၢ ဒဲစီဆှံလီၤ. ဖဲန့ၣ်န့ၣ် အဝဲသ့ၣ်လုၢ်ထီၣ်တၢ်ဆိၣ်ကဲၤနၢမူ ဒ်ပှၤလုၢ်တၢ်အဒိၣ်မၤဝဲအသိးလီၤ. ယဟိဝၤယွၤ တဲဘၣ်စီၤမိၤၡ့ဒီးစီၤအၤဟရိၣ်လၢ– ‘သုးယံၤထီၣ်သုသးဒီး စီၤကိၤရးဒီးအပှၤတက့ၢ်.’
စီၤကိၤရးလဲၤဆူ စီၤမိၤၡ့အအိၣ်လၢ ဒဲစီဆှံလီၤ. မ့မ့ၢ် စီၤဒၤသၣ်, စီၤအဘံရၣ်ဒီးအဝဲသ့ၣ် အဟံၣ်ဖိဃီဖိတဖၣ်န့ၣ် တလဲၤဝဲဘၣ်. ယဟိဝၤယွၤ တဲဘၣ်ပှၤအံၣ်စရ့လးဖိလၢ သုးယံၤထီၣ် သုသးဒီးစီၤကိၤရး, စီၤဒၤသၣ်ဒီးစီၤအဘံရၣ်အဒဲတက့ၢ်. တဘျီဃီန့ၣ် ပှၤအံၣ်စရ့လးဖိတဖၣ် သုးယံၤထီၣ်အသးဒီးအဝဲသ့ၣ်လီၤ. မ့မ့ၢ်စီၤဒၤသၣ်, စီၤအဘံရၣ်ဒီးအဟံၣ်ဖိဃီဖိတဖၣ်
ဆၢထၢၣ်ဝဲလၢအဒဲချၢ ဒီးဖဲန့ၣ်န့ၣ် ဟီၣ်ခိၣ်အိးထီၣ်အသးဒီးယူၢ်လီၤကွံာ် အဝဲသ့ၣ်တဘျီဃီလီၤ. တကးဒံးဘၣ် စီၤကိၤရးဒီးအပှၤ ၂၅၀ လၢအိၣ်လၢဒဲစီဆှံန့ၣ် မ့ၣ်အူဟဲလီၤအီၣ်ကွံာ်အဝဲသ့ၣ်ခဲလၢာ်လီၤ.ဒီးယဟိဝၤယွၤ တဲဘၣ်စီၤမိၤၡ့လၢ– ‘လၢပှၤအံၣ်စရ့လးဖိတဒူၣ်စုာ်စုာ်အကျါန့ၣ် ဟံးန့ၢ်အဝဲသ့ၣ် အခိၣ်နၢ်တဖၣ် အနီၣ်ထိးဘိဒီး ကွဲးလီၤအဝဲသ့ၣ်အမံၤလၢ နီၣ်ထိးဘိအလိၤတက့ၢ်. မ့မ့ၢ်ပှၤလ့ၤဝံဖိတဒူၣ်အနီၣ်ထိးဘိန့ၣ် ကွဲးလီၤစီၤအၤဟရိၣ်အမံၤ, ဒီးလဲၤပာ် နီၣ်ထိးဘိတဖၣ်န့ၣ်လၢ ဒဲစီဆှံအပူၤတက့ၢ်. လၢခံ ပှၤလၢ ယဃုထၢထီၣ်အီၤန့ၣ် အနီၣ်ထိးဘိ ကဖီထီၣ်ဒီးသၣ်ထီၣ်ဝဲလီၤ.’
လၢခံတနံၤန့ၣ် စီၤမိၤၡ့ထုးထီၣ်နီၣ်ထိးဘိတဖၣ် ဒီးဒုးနဲၣ်ဖျါထီၣ်လၢ ပှၤအံၣ်စရ့လးဖိအခိၣ်အနၢ်တဖၣ်အမဲာ်ညါလီၤ. စီၤအၤဟရိၣ်အနီၣ်ထိးဘိန့ၣ် ဖီထီၣ်ဒီးသၣ်ထီၣ်ဝဲလီၤ. အဃိ ယဟိဝၤယွၤပာ်ဂၢၢ်ပာ်ကျၢၤဝဲလၢ အဝဲဃုထၢထီၣ်ဝဲစီၤအၤဟရိၣ်လၢ ပှၤလုၢ်တၢ်အခိၣ်န့ၣ်လီၤ.
“ပှၤလၢအကဲထီၣ် သုခိၣ်တဖၣ်န့ၣ်, စူၢ်အကလုၢ်, ဒီးဆီၣ်လီၤသုသးလၢအဖီလာ်တက့ၢ်.”—ဧ့ၤဘြံၤ ၁၃:၁၇