Vioka mvu miayingi vava Aneyisaele bakala muna makanga, Kora, Datani, Abirami ye 250 ma wantu bakolamena Mose. Bamvovesa vo: ‘Ke tuna diaka ye vuvu mu ngeye ko. Ekuma ofwete kadila mfidi eto, o Arone nganga ambuta? O Yave kena kaka yo ngeye yo Arone ko, una yeto mpe.’ Yave kayangalela mvovo miau ko. Wamuena dio nze yandi bakolamenanga.

Mose wavovesa Kora ye awana banyikama vo: ‘Nuiza kuna saba o mbazi, nunata yokelwa yeno yo zadisa yo ye ndumbu. Yave okutusonga ndiona kasola.’

Muna lumbu kialanda, Kora ye wantu 250 bayenda wanana yo Mose vana saba. Bayoka e ndumbu kana una vo anganga kaka bafwete sala e salu kiaki. Yave wavovesa Mose yo Arone vo: ‘Nuyivambula yo Kora yo wantu bena yandi.’

O Kora wayenda wanana yo Mose vana saba, kansi o Datani, Abirami ye esi nzo zau ke bazola kwenda ko. Yave wavovesa Aneyisaele vo bavambuka vana vakala Kora, Datani yo Abirami. Vana vau, Aneyisaele bakatuka. Datani yo Abirami ye esi nzo zau muna kati kwa saba yau bakala. Kuna kinsalukisa, o ntoto  waziuka yo kubafuka yau awonso. Ekolo bakala vana saba, o tiya tuvaikidi muna nsi a ntoto yo zinisa Kora ye 250 ma wantu banyikama.

Yave wavovesa Mose vo: ‘Tambula o nkau kwa mbuta za makanda mawonso, soneka e nkumbu a konso mbuta muna nkau andi. Kansi muna nkau a kanda dia Levi, soneka mo e nkumbu a Arone. Sia nkau miawonso muna kati kwa saba. O muntu ona nsola, o nkau andi uvaika e mvuma.’

Muna lumbu kialanda, Mose wavaikisa nkau miawonso yo songa mio kwa mbuta za makanda. O nkau a Arone wavaikisa e mvuma yo yima e bundu. Muna mpila yayi, Yave wasonga vo Arone kasola kimana kakala nganga ambuta.