Oˇ ve hkʼawꞈ nawˉ, Iˉsaˍreˍlaˆ chaw heh puiˉ hkʼaw lo chehˇ htaˇ Kawˇraˆ, Daˍtanˍ, Aˍbiˆranˍ leh 250 gʼaˇ Moˉseˍ htaꞈ tawˍ daꞈ ve yoˬ. Yawˇ hui Moˉseˍ htaꞈ kʼoˆ piˇ ve, ‘taˇ kʼoˆ loˬ. Ngaˬ hui nawˬ htaꞈ maˇ yeunˇ hkanˍ gaˇ˗o. Aˬ htoꞈ ma te nawˬ awˬ hoˉ hpehꞈ gaˇ ve le? Aˍronˍ kʼo Paw hkuˇ lonˉ hkʼe hpehꞈ gaˇ ve laˇ? Yaˬhoˉvaˬ nawˬ 2 gʼaˇ geh ceh tiˉ chehˇ ve maˇ heˆ. Teˇ gʼaˇ le le geh yawˇ chehˇ ve yoˬ!’ Yaˬhoˉvaˬ nyi ma zuhˆ jaˇ. Yawˇ hui chi hkʼe kʼoˆ ve lehˬ, Gʼuiˬ sha htaꞈ hpfuhˆ ve hkʼe hpehꞈ ve yoˬ!

Kawˇraˆ leh yawˇ hpawˇ chehˇ ve chaw htaꞈ Moˉseˍ kʼoˆ piˇ ve, ‘shawˉ pawˍ kʼo, aˉ po kʼo bon yehˬ lo laˬ˗oꞈ. A shu yawˇ ve hkehˇ pe le sha hawnˉ tuˉ tanˇ tuˬ kaꞈ yuˬ veu laˇ˗oˆ. Yaˬhoˉvaˬ a shu htaꞈ leuˆ yuˬ ve gʼa mawˬ tuˬ yoˬ.’

Awˬ hkʼawꞈ nawˉ teˇ nyi gaˬ leh Kawˇraˆ leh yawˇ hpawˇ chehˇ ve chaw 250 gʼaˇ aˉ po kʼo bon yehˬ lo Moˉseˍ geh laˬ ve yoˬ. Yawˇ hui Paw hkuˇ hpehꞈ ve hkʼa shuˍ te leh sha hawnˉ tuˉ tanˇ ve yoˬ. Yaˬhoˉvaˬ Moˉseˍ leh Aˍronˍ htaꞈ kʼoˆ piˇ ve, ‘chi teˇ hkui Kawˇraˆ leh yawˇ hpawˇ chehˇ ve chaw hui awˬ paˇ lo taˇ huˉ chehˇ. Haˆ tawˆ la˗o.’

Aˉ po kʼo bon yehˬ lo Kawˇraˆ Moˉseˍ geh kʼai ve yoˬ. Yaꞈ hkʼaˇ, Daˍtanˍ, Aˍbiˆranˍ yawˇ hui ve yehˬ kʼa hkʼaw ve chaw maˇ kʼai. Kawˇraˆ, Daˍtanˍ, Aˍbiˆranˍ hui ve aˉ po kʼo awˬ paˇ lo taˇ chehˇ tehꞈ Yaˬhoˉvaˬ Iˉsaˍreˍlaˆ chaw htaꞈ kʼoˆ piˇ leh Iˉsaˍreˍlaˆ chaw hui kaꞈ oˇ kaˬ lo tawˆ la ve yoˬ. Daˍtanˍ,  Aˍbiˆranˍ yawˇ hui ve yehˬ kʼa hkʼaw ve chaw aˉ po kʼo gʼuˇ suhˍ lo tawˆ la leh huˉ taˍ ve yoˬ. Oˇ ve hkʼawꞈ nawˉ, miˬ guiˬ peꞈ leh yawˇ hui htaꞈ awˬ teꞈ teꞈ˗ehꞈ hehˆ dawˬ ve yoˬ! Aˉ po kʼo bon yehˬ hpawˇ kʼo, Kawˇraˆ leh yawˇ hpawˇ chehˇ ve chaw 250 gʼaˇ mvuhˇ naw ma lo aˬ miˍ ce yaꞈ la leh toꞈ baˬ sheˬ ve yoˬ.

Oˇ ve hkʼawꞈ nawˉ, Yaˬhoˉvaˬ Moˉseˍ htaꞈ kʼoˆ piˇ ve, ‘a shu yawˇ ve awˬ ceuˬ awˬ hkʼaˇ ve awˬ hoˉ a shu yawˇ ve juˇ fuiˍ taˬ yuˬ veu laˇ leh juˇ fuiˍ taˬ hkʼoˆ lo a shu yawˇ ve awˬ meh bvuhꞈ keu taˍ˗oꞈ. Nawˬ lehˬ Aˍronˍ ve juˇ fuiˍ taˬ htaꞈ Leˍviˆ ve awˬ ceuˬ awˬ hkʼaˇ awˬ meh bvuhꞈ keu˗o. Oˇ ve hkʼawꞈ nawˉ, aˉ po kʼo bon yehˬ hkʼaw juˇ fuiˍ taˬ hkʼa peu˗eˬ ca yuˬ teh taˍ˗oꞈ. Ngaˬ a shu teˇ gʼaˇ htaꞈ leuˆ yuˬ ve shiˍ tuˬ juˇ fuiˍ taˬ oˇ ve awˬ veˆ veˆ tuˬ yoˬ.’

Mvuhˇ shawˉ gaˬ leh Moˉseˍ juˇ fuiˍ taˬ hkʼa peu˗eˬ yuˬ tawˆ la leh a shu yawˇ ve awˬ ceuˬ awˬ hkʼaˇ ve awˬ hoˉ htaꞈ maˍ piˇ ve yoˬ. Aˍronˍ ve juˇ fuiˍ taˬ awˬ veˆ veˆ leh awˬ shiˍ nawꞈ la ve yoˬ. Yaˬhoˉvaˬ Aˍronˍ htaꞈ leuˆ yuˬ leh Paw hkuˇ lonˉ te tcuh taˍ ve yoˬ tehꞈ, chaw teˇ gʼaˇ le le shiˍ tuˬ Gʼuiˬ sha chi hkʼe te ve yoˬ.