Hamulaho wa nako, Maisilaele inze bali mwa lihalaupa, Kora, Datani, Abirami, ni babañwi ba 250 bakwenuhela Mushe. Kihaa bali ku yena: ‘Mulukatalize hahulu! Ki kabakalañi wena hauswanela kuba mueteleli waluna, ni Aruni haswanela kuba muprisita yapahami? Jehova u mwahalaa luna kaufela, isiñi feela ku wena ni Aruni.’ Jehova naasika tabiswa ki taba yeo. Naaikutwile inge kuli neba mukwenuhela!

Mushe abulelela Kora ni batu bahae ali: ‘Mutahe kwa tabernakele kamuso, mutise lipizana zamina za mulilo ili zeselilwe insense. Mi Jehova uka lubonisa yaketile.’

Habusa, Kora ni baana ba 250 baya kwa tabernakele kuyo kopana ni Mushe. Teñi koo, bacisa insense inge kuli neli baprisita. Jehova abulelela Mushe ni Aruni, ali: ‘Hamuikauhanye ku Kora ni batu bahae.’

Nihaike kuli Kora naaile ku Mushe kwa tabernakele, Datani, Abirami ni mabasi abona, bona nebahanile kuya. Jehova abulelela Maisilaele kuli bazwe mwa litende za Kora, Datani, ni Abirami.  Honafo feela, Maisilaele bazwa mwateñi. Datani, Abirami, ni mabasi abona, bayema fande a litende zabona. Honafo feela, mubu fone bayemi waikaba mi lifasi la bamiza! Hane bali kwa tabernakele, mulilo wazwa kwa lihalimu ni kuto cisa Kora ni batu bahae ba 250.

Jehova cwale ali ku Mushe: ‘Uunge mulamu ku mueteleli wa lusika ni lusika, mi uñole libizo lahae fateñi. Kono fa mulamu wa lusika lwa Livi, uñole fateñi libizo la Aruni. Mubeye milamu kaufela mwahalaa tabernakele, mi mulamu wa mutu yeniketile ukatubula lipalisa.’

Habusa, Mushe atisa milamu kaufela mi aibonisa baeteleli. Mulamu wa Aruni neumelile lipalisa mi neubeile lialumondi zebuzwize. Ka nzila yeo, Jehova naabonisize kuli naaketile Aruni kuba muprisita yapahami.