Yajxitl, akux ateʼtoq aj Israel toj tzqij txʼotxʼ, el kypan kyibʼ Coré, Datán, Abiram ex 250 xjal tiʼj Moisés. Xi kyqʼamaʼn jlu te: «¡Ya ma qo sikte kyiʼje! ¿Tiquʼn aya il tiʼj tuʼn ttena te nejenel qeye? ¿Ex tiquʼn il tiʼj tuʼn tok Aarón te tnejel pal? Nya oʼkx at Jehová tukʼila ex tukʼil Aarón, ax ikx at qukʼile». Nya bʼaʼn ela jlu toj twitz Jehová, tuʼnju kubʼ tnaʼn qa nya kyajtoq xjal lu tuʼn kybʼin te.

Xi tqʼamaʼn Moisés te Coré ex kyukʼil qeju ateʼtoq tukʼil: «Ktzaje nchiʼj toj ja xbʼalun ex kyiʼntze tkubʼel incienso nojni tuʼn incienso. Ktzajel tyekʼin Jehová alkye o jaw tjyoʼn».

Toj juntl qʼij, i eʼx Coré kyukʼil 250 xjal tuʼn tok kychmon kyibʼ tukʼil Moisés toj ja xbʼalun. Ex atztzun kubʼ kypatin incienso ik tzeʼn aqe pal. Tzajtzun tqʼamaʼn Jehová te Moisés ex te Aarón: «Kypaʼmil kyibʼe tiʼj Coré ex qe t-xjalil».

Otoq meltzʼaj Coré toj ja xbʼalun atz jatumel taʼtoq Moisés, atzunte Datán, Abiram ex qeju toj kyja mintiʼ i eʼx. Tzaj tqʼamaʼn Jehová kye aj Israel: «Kypaʼmil kyibʼe kyiʼj toj tja Coré, Datán ex Abiram». Jun rat naj el kypan kyibʼ aj Israel kyiʼj. Atzunte Coré,  Datán, Abiram ex qeju toj kyja, ax e kyaj weʼ ttzi kyja. Noq minabʼen xi pax txʼotxʼ ex i ex tzʼaq qeju nya bʼaʼn xjal lu toj. Atzun toj ja xbʼalun, kuʼtz qʼaqʼ toj kyaʼj ex e kubʼ tnajsaʼn Coré kyukʼex 250 xjal.

Yajxitl, xi tqʼamaʼn Jehová jlu te Moisés: «Qʼamanxa kye nejenel te teyele junjun kʼloj xjal tuʼn ttzaj kyiʼn kytzeʼ. Tzʼibʼinka tbʼi teyele junjun nejenel tiʼj ttzeʼ. Pero atzun tiʼj kʼloj kyyajil aj Leví, tzʼibʼinka tbʼi Aarón tiʼj. Qʼonkxa kykyaqil tzeʼ toj ja xbʼalun. Aju xjal kjawil nskʼoʼne, kʼelel chʼiy bʼech tiʼj ttzeʼ».

Toj juntl qʼij, etz tiʼn Moisés kykyaqil tzeʼ ex xi tyekʼin kye nejenel. Otoq tzaj chʼiy bʼech tiʼj ttzeʼ Aarón ex otoq che qʼanax almendras tiʼj. Iktzun tten kubʼ tyekʼin Jehová qa a Aarón otoq jaw tjyoʼn tuʼn tok te tnejel pal.