Lino papisile insita ala Aina Izlaeli yali umu lwanga, Kola, Datani, Abilamu, na onsi yauze 250 yaapondokile Mose. Yaalanzile iyati: ‘Itutonta namwe! U mulandu ci uno ungaatutungulwila, Aloni nawe ukuya simapepo mukalamba? Naswe kwene Yeova ali naswe asi sile wewe na Aloni.’ Yeova ataatemilwe vino yaacisile nupya waweni vino yamupondokile.

Mose wanenyile Kola na antu yakwe ati: ‘Mutondo mukize ukwi tenti lya kupepelapo nupya mukize ni vyakocelapo ivinunkile. Yeova alatulanga wino wasoolola.’

Uwanda uwalondelilepo, Kola na onsi 250 yaakomenkine na Mose api tenti lya kupepelapo. Kuuku akuno yocile ivinunkile kwati nayo aa simapepo. Yeova wanenyile Mose na Aloni ati: ‘Muipaatule kuli Kola na antu yakwe.’

Nanti cakuti Kola waile akomenkana na Mose ukwi tenti lya kupepelapo, Datani, Abilamu ni ndupwa zyao yakanyile ukuyako. Yeova waneenyile Aina Izlaeli ukufuma uku matenti yakwe Kola, Datani, na Abilamu. Nupya papo kwene sile Aina Izlaeli yaafumileko. Datani, Abilamu ni ndupwa zyao iimilile ukunzi ya  mateti yao. Mukupumikizya umusili wayulike nu kuyamila. Ukwi tenti lya kupepelapo nako umoto osile Kola na onsi 250.

Yeova waneenyile Mose ati: ‘Toola intuwa kuli cila ntunguluzi ya mu mutundu alino ulembe mazina ya ntunguluzi pa ntuwa kwene zizyo. Lelo pa ntuwa iya mu mutundu wake Levi pene, ulembepo izina lyakwe Aloni. Nupya intuwa zizyo uziike umwi tenti lya kupepelapo, alino intuwa iya muntu wino insoolola imawalula.’

Uwanda uwalondelilepo, Mose wafumizye intuwa nu kulanga intunguluzi. Intuwa yakwe Aloni yawalwile, nupya yaseesile maaumondi. Umu nzila kwene ii, Yeova walangizye ukuti wasoolwile Aloni ukuya simapepo mukalamba.