Teipa, kema israeleuanij nojua itstoyaj ipan uaktok tlali, Coré, Datán, Abiram uan sekinok 250 tlakamej kiijixnamijkej Moisés. Kiiljuijkej: “¡Ayokmo tiinmechijiyouiaj! ¿Kenke moneki ta titechyakanas? ¿Uan kenke moneki Aarón elis nopa sumo sacerdote? Jehová nojkia itstok touaya, amo san itstok inmouaya”. Jehová amo kipaktik tlen kiijtojkej pampa kiitak kejuak yaya kiijixnamikiyayaj.

Moisés kiiljuik Coré uan katli iuaya itstoyaj: “Xiualakaj mostla ipan tabernáculo uan xijualikakaj nopa incienso tlen inkitlatisej. Jehová technextilis ajkia kitlapejpenijtok”.

Ualmostla, Coré uan nopa 250 tlakamej mosentilijkej iuaya Moisés ipan tabernáculo. Nopaya pejkej kitlatiaj incienso kejuak eliskiaj sacerdotes. Uajka Jehová kiiljuik Moisés uan Aarón: “Ximouejkatlalikaj tlen Coré uan katli iuaya itstokej”.

Maske Coré kena yajki kampa Moisés itstoya, Datán, Abiram uan ininchampoyouaj amo kinejkej yasej. Jehová kiniljuik israeleuanij: “Ximouejkatlalikaj tlen ininchaj Coré, Datán uan Abiram”. Israeleuanij nimantsi kintlalkauijkej. Uan Datán, Abiram uan ininchampoyouaj mokajkej kalteno ipan ininyoyonkaljuaj. Uajka  nopa tlali motlapok uan nopa tlaijixnamikinij uetsitoj tlalijtik. Uan ipan tabernáculo, temok tlitl tlen iluikak uan kintsontlamiltik Coré uan nopa 250 tlakamej.

Teipa, Jehová kiiljuik Moisés: “Xikiniljui nopa tlayakananij ma kiualikakaj ininkuatopil. Uan ipan ininkuatopil xikijkuilo inintoka. Ipan ikuatopil nopa ueyi familia Leví, xikijkuilo Aarón itoka. Teipa, xijuika ininkuatopil kalijtik ipan tabernáculo. Uan ikuatopil nopa tlakatl katli na nijtlapejpenis, xochiyouas”.

Ualmostla, Moisés kikixtik ininkuatopil nopa tlayakananij uan kinnextilik. Aarón ikuatopil xochiyojtoya uan kipixtoya ijiksitok almendras. Kiampa Jehová kinextik kitlapejpenijtoya Aarón kej sumo sacerdote.