No papera nguva shomani, vaIziraeri pavainga muzvipare, Kora, Dathaa na Abhirao no vamweni vaikwana 250 vakapandukira ngo kumukira Mosi. Ivona vakati: ‘Taremba kutungamirihwa ndiwe! Ngenyi ndiwe wega unodikana kuva mutungamirire wedu zve Aroni mupiri mukuru? Jehovha ari pakati pedu tese, haiwa basi pakati pako na Aroni.’ Jehovha aazivi kuzvidakarira. Iyena wakazvivona inga kumupandukira!

Mosi wakati kuna Kora no vabeseri vake: ‘Mangwana vianyi ku tabherinake zve viisanyi zvirubhani zvenyu zvecibhwaka. Jehovha anozotitatija vaya vaanosana.’

Pa njiku yakatevera, Kora no 250 o vanarume vakasongana na Mosi mu tabherinake. Kondhoyo ivona vakapisa rubani inga vapiri. Jehovha wakati kuna Mosi na Aroni: ‘Parajananyi na Kora no vanarume vake.’

Pikija Kora wainga wakaenda na Mosi ku tabherinake, Dathaa, Abhirao no ukama hwavo vakaramba kwenda. Jehovha wakabvunja vaIziraeri kuti vabude pa tende ya Kora, Dathaa na Abhirao. Ngokukasika, vaIziraeri vakabuda. Dathaa, Abhirao no  mbhuri javo vakaima kunja ko matende avo. Ngo cibvumbu pasi pakamweka zve pakavamija! Mu tabherinaki, makabuda muriro zve wakapisa Kora no vabesere vake vanokwana 250.

Jehovha wakati kuna Mosi: ‘Batai Ndonga yo mutungamiriri wo jinja rimwe nga rimwe zve tarai zina rako. Asi pa ndonga yo jinja ro vaRevhi, tarai zina ra Aroni. Jidirei mukati mo tabherinake zve ndonga yo mwanarume wandinozosana inozothombokera kana kupfikitira.’

Pa njiku yakatevera, Mosi wakabvisa kunja Ndonga jese zve waitatija kuvatungamiriri. Ndonga ya Aroni yainga yathombongekera zve yainga yamera amendowa. Ngo njira iyi, Jehovha wakavonesa kuti wainga wasana Aroni kuti ave mupiri mukuru.