पाठ २७
तिनीहरूले यहोवा परमेश्वरको विरोध गरे
केही समयपछि इस्राएलीहरू निर्जनभूमिमै हुँदा कोरह, दातान, अबिराम र अरू २५० जना इस्राएलीले मोसाको विरोध गरे। तिनीहरूले मोसालाई भने: ‘अब त अति भयो! तपाईँ किन हाम्रो नाइके र हारुन हाम्रो प्रधानपुजारी हुनुपऱ्यो र? यहोवा परमेश्वर तपाईँ र हारुनसँग मात्र होइन, हाम्रो साथमा पनि हुनुहुन्छ।’ यो देखेर परमेश्वरलाई दुःख लाग्यो र तिनीहरूले उहाँकै विरोध गरेको ठान्नुभयो।
मोसाले कोरह र तिनका समर्थकहरूलाई भने: ‘भोलि बिहान आ-आफ्नो धुपौरोमा धूप राखेर वासस्थानमा आउनू। यहोवा परमेश्वरले कसलाई रोज्नुहुन्छ, उहाँले नै थाह दिनुहुनेछ।’
भोलिपल्ट कोरह र तिनका २५० जना समर्थक मोसालाई वासस्थानमा भेट्न आए। आफू पुजारी भएझैँ तिनीहरूले आ-आफ्नो धुपौरोमा धूप बाले। यहोवा परमेश्वरले मोसा र हारुनलाई भन्नुभयो: ‘कोरह र त्यसका मानिसहरूबाट अलग्गै बस।’
कोरह मोसालाई वासस्थानमा भेट्न गए तर दातान, अबिराम र तिनीहरूका परिवार जान मानेनन्। यहोवा परमेश्वरले इस्राएलीहरूलाई कोरह, दातान र अबिरामको पालबाट पर हट्न भन्नुभयो। यो सुन्नेबित्तिकै इस्राएलीहरू पर हटे। दातान, अबिराम र तिनीहरूका परिवार आ-आफ्नो पालबाहिर उभिए। अचानक
जमिन फाट्यो र तिनीहरूलाई निल्यो! वासस्थानमा चाहिँ परमेश्वरले आगो बर्साउनुभयो अनि धूप चढाइरहेका कोरह र तिनका २५० जना समर्थक नाश भए।त्यसपछि यहोवा परमेश्वरले मोसालाई यसो भन्नुभयो: ‘इस्राएलीहरूको प्रत्येक कुलको कुलनायकबाट एक-एक वटा लौरो लिनू र त्यसमा तिनीहरूको आ-आफ्नो नाम लेख्नू। लेविको कुलको लौरोमा चाहिँ हारुनको नाम लेख्नू। ती लौरोहरू वासस्थानभित्र राख्नू र म जसलाई रोज्छु, तिनको लौरोमा कोपिला लाग्नेछ।’
भोलिपल्ट मोसाले वासस्थानबाट लौरोहरू बाहिर ल्याएर कुलनायकहरूलाई देखाए। हारुनको लौरोमा फुलेको फूल र पाकेको कागजी बदाम थियो। यसरी यहोवा परमेश्वरले हारुनलाई प्रधानपुजारी हुन रोज्नुभएको कुरा देखाउनुभयो।
“जसले तिमीहरूबीच अगुवाइ लिइरहेका छन्, तिनीहरूप्रति आज्ञाकारी होओ र तिनीहरूको अधीनमा बस।”—हिब्रू १३:१७