Konima yethimbo lyontumba, manga Aaisraeli ya li mombuga, Kora, Datan, Abiram nosho wo aalumentu 250 oya tsu ondumbo naMoses. Oya lombwele Moses ya ti: ‘Otwe ku vulwa! Omolwashike ongoye wu na okukala omuwiliki gwetu, na Aaron omuyambimukuluntu? Jehova oku li pamwe natse atuhe, ihe ke li owala pamwe nangoye naAaron.’ Oshinima shoka Jehova ka li e shi hokwa. Okwa li e shi tala ko a fa oye ta tamanekwa.

Moses okwa lombwele Kora naayambidhidhi ye a ti: ‘Ileni ongula ketsalihangano, eteleleni iikangwa yeni yomulilo yu udha iitsinino. Jehova ote ku ulika kutya okwa hogolola lye gwomutse.’

Mesiku lya landula, Kora naalumentu ye 250 oya yi ya ka tsakanene naMoses ketsalihangano. Oya fike iitsinino hoka, ya fa oyo aayambi. Jehova okwa lombwele Moses naAaron a ti: ‘Zii po utale puKora naantu ye.’

Nonando Kora okwa yi kuMoses ketsalihangano, Datan naAbiram nomaukwanegumbo gawo, oya tindi ko. Jehova okwa lombwele Aaisraeli ya ze mo metsali lyaKora, lyaDatan nolyaAbiram. Mbalambala Aaisraeli oya zi mo. Datan, Abiram  nomaukwanegumbo gawo oya thikama pondje yomatsali ngoka. Evi olya makula okana kalyo ombadhilila nolye ya nina po. Petsalihangano, omulilo ogwa zi megulu e tagu lungunitha po Kora naalumentu ye 250.

Jehova okwa lombwele Moses a ti: ‘Kutha ondhimbo yomuwiliki gwezimo kehe. Kondhimbo kehe nyola ko edhina lyamwene gwayo. Ihe kondhimbo ndjoka yi lile po Aalevi, nyola ko edhina lyaAaron. Dhi fala metsalihangano, nondhimbo yomuntu ngoka nda hogolola, otayi ka tutuma oongala.’

Mesiku lya landula, Moses okwe eta oondhimbo adhihe nokwe dhi ulukile aawiliki. Ondhimbo yaAaron oya tsapuka oongala noyi imi oomandeli dho oloya. Momukalo nguka, Jehova oku ulike kutya okwa hogolola Aaron a ninge omuyambimukuluntu.