Ku haahingwireho obwire, obu Abaisraeli baabaire bari omu ihamba, Koora, Dasani, Abiraamu, n’abandi 250 bakagomera Musa. Bakamugira bati: ‘Mwekurize mwahingurana. Ahabw’enki niwe oine kutwebembera kandi Arooni akaba omunyamurwa omukuru? Yehova ari naitwe twena, beitu atari iwe na Arooni mwenka.’ Yehova tarashemereirwe. Akabareeba nk’abaamugomera.

Musa akagambira Koora n’omutwe gw’abantu be ati: ‘Nyencakare mwije aha ihema, kandi mwije n’ebyoterero byanyu mubiteho obubaane. Yehova naija kworeka ou atooraine.’

Eizooba eryakuratsireho, Koora n’abashaija 250 bakagyenda kubugana Musa aha ihema. Bakatandika kwosya obubaane nk’abanyamurwa. Yehova akagambira Musa na Arooni ati: ‘Mwetaanise ahari Koora n’abashaija be.’

N’obu Koora araabe yaagire kubugana Musa aha ihema, Dasani, Abiraamu, n’ab’omu maka gaabo bakanga kuzayo. Yehova akagambira Abaisraeli kwetaanisa aha mahema ga Koora, Dasani, na Abiraamu. Ahonaaho, Abaisraeli bakarugaho. Dasani, Abiraamu, n’ab’omu maka gaabo baakashohora baayemerera aha miryango y’amahema gaabo. Ahonaaho ensi ekaashama yaabamira! Aha  ihema, omuriro gukaruga omu iguru gwayotsya Koora n’abashaija be 250.

Yehova akagambira Musa ati: ‘Twara enkoni emwe kuruga ahari buri mwebembezi wa buri ruganda, kandi ohandiikye eiziina rya buri muntu aha nkoni ye. Kwonka ohandiikye eiziina rya Arooni aha nkoni y’oruganda rwa Leevi. Ozibiikye omu ihema, kandi enkoni y’omushaija ou ndatoorane neija kutooka erabye.’

Aha kiro ekyakuratsireho, Musa akashohoza enkoni zoona yaazooreka abeebembezi. Enkoni eya Arooni ekaba etookire erabize, kandi ereetsire enjuma zihiisize ezirikwetwa endozi. Omu muringo ogu, Yehova akakihamya butunu ngu akaba atooraine Arooni kuba omunyamurwa omukuru.