Israelitacuna shitashca pambacunapi cajpirajmi Coré, Datán, Abiram, shujtaj 250 runacunapish Moisespaj contra tucushpa, ‘cancunahuanca shaicushcami canchij. ¿Imamantataj canca ñucanchijta pushaj cangui? ¿Aaronpish imamantataj sacerdotecunata mandaj can? Jehová Diosca mana cancunallahuanchu. Ñucanchijhuanpishmi can’ nircacunami. Chaitaca Diosca mana munarcachu. Diosca chai runacuna paipaj contra tucushcatami ricurca.

Coretapish paihuan cajcunatapish Moisesca, ‘inciensota rupachinapi inciensota churashpa Diospaj carpa huasiman caya shamunguichij. Chaipi Dios maijantami agllashcata ricushun’ nircami.

Cayandij punllaca Corepish 250 runacunapish Moiseshuanmi Diospaj carpa huasipi tandanacurcacuna. Chaipimi paicunaca sacerdote shina inciensota rupachi callarircacuna. Chaimantami Moisestapish Aarontapish Diosca, ‘Coremanta, paihuan caj runacunamantapish anchuichij’ nirca.

Coreca Diospaj carpa huasimanmi rishca carca. Pero Datán, Abiram, paipaj familiacunapish mana risha nishcacunachu carca. Diosca israelitacunataca, ‘Corepaj, Datanpaj, Abirampaj carpa huasi muyundijpi cajcuna anchuichij’ nircami. Israelitacunaca utcami anchurcacuna. Pero Datán, Abirampish familiacunandijmi paicunapaj  carpa huasi cꞌuchupi saquirircacuna. Ñapish allpa pascarishpami mana cazujcunata millpurca. Diospaj carpa huasi jahuamanta nina shamushpami Coreta, 250 runacunatapish tucuchirca.

Qꞌuipaca Diosca Moisestaca, ‘israelitacunapaj aillucunata pushajcunataca tauna caspicunata apamuchun mandai. Chai taunacunapica cada pushajpaj shuticunata quillcangui. Leví aillupaj taunapica Aaronpaj shutita quillcangui. Chaicunataca Diospaj carpa huasi ucupi churangui. Ñuca agllashca runapaj taunapica sisami huiñanga’ nircami.

Cayandij punllaca Moisesca tucui taunacunata llujshichishpaca pushajcunamanmi ricuchirca. Aaronpaj taunapimi sisacuna, almendracuna huiñashca carca. Chashnami Diosca sacerdotecunata mandaj cachunca Aaronta agllashcata ricuchirca.