Chay qhepamanmi Coré, Datán, Abiram, 250 runakuna ima Moisés contra Aarón contra jatariranku, nirankun: “¡Sayk’uykuñan kamachiwasqaykikumanta! ¿Imaraykun qan kamachiwanaykiku? ¿Imaraykutaq Aaronpas uma sacerdote kanan? Jehová Diosqa manan qankunallawanchu kashan, llapanchiswanmi kashan”, nispa. Diosmi ichaqa chayta qhawariran pay contra jatariyta jina.

Moisesmi Coreta yanapaqninkunatawan niran: “Paqarin adorana karpaman jamuychis inciensota q’apachinaykichispaq. Chaypin Diosqa rikuchinqa pitachus ajllakusqanta”, nispa.

Qhepa p’unchaymi Corewan 250 runakunapiwan adorana karpaman riranku. Jinan sacerdotekuna jina inciensota q’apachiranku. Chaymi Diosqa Moisesta Aarontapas niran: “T’aqakuychis Coremanta apoyaqninkumantawan”, nispa.

Datanwan, Abiramwanmi mana adorana karpapichu kasharanku. Jinan Jehová Diosqa Israel runakunata niran: “Corepa, Datanpa, Abirampa tiyasqanku karpakunamanta t’aqakuychis”, nispa. Runakunataq usqhayta t’aqakuranku.  Datanpas, Abirampas familiankupas karpankupin qhepakuranku. Jinan allpa kicharikuspa llapankuta millp’uran. Adorana karpapitaq cielomanta nina uraykamuspa Coreta 250 runakunatawan rupharan.

Chay qhepamanmi Diosqa Moisesta niran: “Ayllukunamanta umallikuna taunankupi sutinkuta churachunku. Leví aylluq taunanpiqa Aaronpa sutintan churankichis. Jinaspa chay taunakunata adorana karpapi churankichis. Jinan ajllakusqay runaq taunan t’ikarinqa”, nispa.

Qhepa p’unchaymi Moisesqa taunakunata orqomuran. Jinan Aaronpa taunanqa t’ikarispa almendrata rururan. Chaywanmi Jehová Diosqa sut’ita rikuchiran uma sacerdote kananpaq Aaronta ajllakusqanta.