Palo disavo vreme, dži o Izraelcija hine ki pustinja, o Korej, o Datan, o Aviron hem avera 250 manuša bunindže pe protiv o Mojsije. On phendže ljese: „Dosta hine više! Sose mora baš tu te ove amaro vođa, a o Aron prvosvešteniko? O Jehova tano hem amencar, a na samo tuvaja hem e Aroneja.“ E Jehovase odova na sviđindža pe. Ov ko odova dikhlja sar te buninen pe protiv oljeste.

O Mojsije phendža e Korejese hem e manušendže so hine oljeja: „Aven tajsa ko šator hem anen tumare kadionice so isi ljen kad. O Jehova ka mothovi kas birindža.“

Tajsato dive, o Korej hem o 250 manuša dželje ko sveto šator kaj hine hem o Mojsije. Odothe thardže o kad sar so čerdže o sveštenikija. O Jehova phendža e Mojsijese hem e Aronese: „Ciden tumen ando Korej hem ando oljese manuša.“

O Korej dželo ko sveto šatori, ama o Datan, o Aviron hem oljenge porodice na manglje te džan. O Jehova vačerdža e Izraelcendže te ciden pe ando e Korejese, e Datanese hem e Avironese šatorija. O Izraelcija odmah cidindže pe. O Datan, o Aviron hem oljenge porodice terdilje anglo pe šatorija. Ando jekh  puti i phuv phravdilji hem on pelje andre! Ko ulaz ando sveto šator, alji i jag ando Jehova hem thardža e Koreje hem oljese 250 manušen.

O Jehova vačerdža e Mojsijese: „Lje po jekh kaš ando poglavari ando svako pleme. Ko svako kaš pisin e poglavareso nav, ama ko kaš ando e Levijeso pleme pisin e Aroneso nav. Palo odova, čhiv o kašta ko sveto šator. Kas ka birinav, ko oljeso kaš ka barjon luludža.“

Aver dive, o Mojsije ikaldža sa o kašta hem mothovdža ljen e poglavarendže. Ko e Aroneso kaš barilje luludža hem zrela bademija. Ko akava način, o Jehova mothovdža so birindža e Arone te ovel prvosvešteniko.