Shiima yanna gedensaanni, Israeelete manni halalla heeˈreenna Qore, Daataani, Aberooninna wolu 250 manni Musera finqili. Insa Muse togo yitu: ‘Kiˈne quwa mayira saˈinanni? Ati massagaanchonke ikka dihasiissannohe; Aaroonino kakkalaanote biilo ikka dihasiissannosi. Yihowa atenna Aarooni ledo calla ikkikkinni ninke ledono noowe.’ Tini ikkitonsa Yihowa dihagiirsiissino. Yihowa Isiraeele Isira finqiltinohu gede asse laino!

Muse Qoreranna ledosi noorira togo yii: ‘Gaˈa soodo hixaananna baccichoho giira haadhine qullaawu dunkaaniwa amme. Hakkiinni Yihowa doodhino manchi ayetiro hakkawote anfanni.’

Layinki barra, Qore 250 manni ledo qullaawu dunkaaniwa dayi. Hakkiicho insa kakkalaasinete gede hixaana giirtu. Yihowa Musenna Aarooni ‘Kiˈne Qorenna ledosi noo manni mulinni hoˈle’ yiinsa.

Qore qullaawu dunkaaniwa marinoha ikkirono, Daataani, Aberooninna mininsa manni kayinni didangeemmo yiino. Yihowa Israeelete manna, ‘Qore, Daataaninna Aberooni dunkaani mulinni  hoˈle’ yiinsa. Israeelete manni bayichonko hakkiinni hoˈli. Daataani, Aberooninna mininsa manni fulte dunkaaninsa xullichira uurritu. Hakkiinni hedeweelcho baatto dadhante egemmitunsa! Qullaawu dunkaaniwa giira dirrite, Qorenna ledosi nooha 250 manna shakki assite ittu.

Hakkiinni Yihowa Musera togo yiisi: ‘Mitte mittente gaˈre sooreeyyeta siqqonsa haadhe aanaho suˈmansa borreessi. Leewi gaˈre siqqo aana Aarooni suˈma borreessi. Tenne siqquwa qullaawu dunkaani giddo wori. Hatte yannara ani dooroommo manchi siqqo daraartanno.’

Layinki barra, Muse baalanta siqquwa haaˈre sooreeyyete leellishi. Aarooni siqqo daraarte kookete guma laaltino. Konni garinni Yihowa Aarooni kakkalaasinete biilo asse doorinota leellishi.