Su tempong tau Israel su padang belantara, i Korah, Datan, Abiram, dingangu 250 su kataune, limawang si Musa. I sire nẹ̌bera, ’I kami seng tawe makatahang! Kawe harusẹ̌ i kau makoạ těmbonang i kami kụ i Harun makoạ imang mawantugẹ̌? Yehuwa ene dingangi kitẹ kěbị bal᷊inẹ kětạeng dingangi rua.’ Yehuwa tawe mal᷊uasẹ̌ su hal᷊ẹ̌ ene. Su těngong Yehuwa, apa nikoạ i sire ene mẹ̌sul᷊ungu limawang si Sie!

Musa naul᷊ị si Korah dingangu su manga tumatol᷊ene, ’Dịěllo, děntạe sarang tabernakel, kụ pẹ̌bawa tampạ seng nilohongu dupa. Yehuwa sarung měnodẹ si kitẹ i sai nipile-Ne.’

Sěngkarịěllone, Korah dingangu 250 esẹ ene nakoạ sarang anung i Musa su tabernakel, bọu ene něnutung dupa kere imang. Yehuwa naul᷊ị si Musa dingangi Harun, ’Pẹ̌těngkarau bọu i Korah dingangu manga tumatol᷊ene.’

Korah seng nẹ̌sombang dingangi Musa su tabernakel, katewe i Datan, Abiram, dingangu kěluargang i sire madiri makoạ sarang tabernakel. Yehuwa něngoro su tau Israel pẹ̌těngkarau bọu kemang i Korah, Datan, dingangi Abiram. Tau Israel apidu někoạ  kere apa seng niul᷊ị i Yehuwa. Su tempo ene, Datan, Abiram, dingangu kěluargang i sire dụdarisị su rělahu kemang i sire. Sěngkělěndịu, ěntana nawuka kụ něngělụ si sire! Su tabernakel, putung limintụ kụ něnutung si Korah dingangu 250 tumatol᷊ene.

Yehuwa naul᷊ị si Musa, ’Pěngal᷊ạ těkingu manga těmbonangu suku, kụ pěmohẹ areng i sire su manga těking ene. Katewe su těkingu suku Lewi, bohẹ areng i Harun. Taho manga těking ene su ral᷊ungu tabernakel, kụ těkingu tau nipile-Ku sarung mẹ̌bungang.’

Sěngkarịěllone, Musa něněbang kěbị těking kụ něnodẹ ene su manga těmbonang. Su těking i Harun piạ bungang dingangu buang almond masasạ. Ene mangal᷊ene Yehuwa kahěngang-hěngang němile si Harun nakoạ imang mawantugẹ̌.