Ninújngoo mbiʼi, nákhi rí israelitas xóó kúwi̱i̱n náa ku̱ba̱ʼ mixooʼ, Coré, Datán, Abiram gajmíi̱n imbá 250 xa̱bekha nixu̱xi̱mi̱jna̱ náa inuu Moisés. Nitháán: “¡Néʼnguxu ga̱jma̱a̱ numuu rí nunila ikháanʼ! Náa numuu gíʼmaa manindxa̱ʼ ikháánʼ bi̱ kayá edxu̱u̱ náa ikháanʼxu rá. Náa numuu rí Aarón kaʼyoo mbayá edxu̱u̱ náa ndxajkun rá. Raʼkháa i̱ndó náa ikháanʼ ga̱jma̱a̱ Aarón xtáa Jeobá, ma̱ngaa xtáa náa ikháanʼxu”. Jeobá tániguuʼ rí nithi xúʼko̱ numuu rí ndiʼyoo rí nixuximi̱jna̱ náa inuu ikhaa.

Moisés niʼthúu̱n Coré gajmíi̱n xúgínʼ bi̱ numbayíí: “Gaguwáʼla náa tabernáculo gájtsii ga̱jma̱a̱ gudala tséjui̱i̱ mu ikhí gúrajkuáa incienso. Jeobá masngájma tsáa niraʼwíi”.

Imbo̱ʼ mbiʼi, Coré gajmíi̱n 250 xa̱bekha nigún gúyáá Moisés náa tabernáculo. Ikhí nigíʼdi̱i̱ nitsikha incienso xó má nuni ndxajkun. Ikhú Jeobá niʼthúu̱n Moisés ga̱jma̱a̱ Aarón: “Gutsingumijnala náa Coré gajmíi̱n xa̱bi̱i̱”.

Coré ni̱jkhá gaʼyoo Moisés náa tabernáculo, mu Datán, Abiram gajmíi̱n bi̱ kuwa náa goʼwóo na̱nguá nindúún gágun. Jeobá niʼthúún bi̱ israelitas: “Gutsingumijnala náa goʼwóo Coré, Datán  ga̱jma̱a̱ Abiram”. Bi̱ israelitas nacha̱ má nini wajimijna. Datán, Abiram gajmíi̱n bi̱ kuwa náa goʼwóo niguájun náa rexo̱o̱ guʼwún. Nda̱a̱ tsu̱ma̱, ku̱ba̱ʼ nimbaʼtoo ga̱jma̱a̱ nijngún bi̱ tsénimbu̱ún. Náa tabernáculo, mbá aguʼ nigajtaa mekhuíí ga̱jma̱a̱ niʼni gámbáa Coré gajmíi̱n mbá 250 xa̱bekha.

Nda̱wa̱á, Jeobá niʼthúu̱n Moisés: “Xúgínʼ xa̱bu̱ bi̱ kuya̱ edxu̱u̱ náa mámbá tribu maguwáʼ kudúún bastón ndrígu̱ún. Ataniraʼmáʼ mbiʼyuu mámbáa náa bastón ndrígóo. Mu náa tribu ndrígóo Leví, ataniraʼmáʼ mbiʼyuu Aarón. Ataxúdaaʼ náa awúu̱n tabernáculo. Bastón ndrígóo xa̱bu̱ bi̱ ikhúúnʼ garaʼwíí, majmi̱di̱ ri̱ʼi̱”.

Imbo̱ʼ mbiʼi, Moisés niguwíi xúgíʼ bastón ga̱jma̱a̱ nisngájmun bi̱ kuya̱ edxu̱u̱. Bastón ndrígóo Aarón nikráʼáan ri̱ʼi̱ ga̱jma̱a̱ nigiʼdoo almendras niʼgo̱o̱. Xúʼko̱ Jeobá niniñuʼ kaʼwu dí Aarón mbayá edxu̱u̱ náa ndxajkun.