Ysraýyllaryň çölde ýaşap ýörenine köp wagt boldy. Bir gün Karun, Datan, Abyram bilen 250 adam Musa garşy çykdy. Olar: «Biz sizi diňlejek däl. Diňe siz ýolbaşçy bolmalymy? Diňe Harun baş ruhany bolmalymy? Ýehowa bize-de kömek edýär» diýdiler. Şonda Ýehowanyň gahary geldi. Olar Musa bilen Haruna däl, Ýehowa garşy çykdylar.

Musa Karuna we ýanyndaky adamlara: «Ertir mukaddes çadyra geliň. Tütetgi ýakmak üçin gabyňyzy hem getiriň. Ýehowanyň kimi saýlandygyny görersiňiz» diýdi.

Ertesi gün Karun bilen 250 adam mukaddes çadyryň öňüne bardy. Olar getiren gaplarynda tütetgi ýakdylar. Ýöne tütetgini ruhanylar ýakýardy. Ýehowa Musa bilen Haruna: «Olaryň ýanyndan aýrylyň» diýdi.

Musanyň aýdyşy ýaly, Karun çadyra geldi. Ýöne Datan, Abyram we maşgalasy mukaddes çadyryň ýanyna gelmedi. Ýehowa ysraýyllara: «Karunyň, Datanyň we Abyramyň çadyrynyň ýanynda durmaň» diýdi. Olar hem derrew başga  ýere geçdiler. Datan bilen Abyram aýaly hem çagalary bilen çadyrynyň daşynda durdy. Birdenem ýer ikä bölündi, olar içine gaçdylar. Şeýdip, ählisi öldi. Ýöne Karun bilen 250 adam mukaddes çadyryň ýanynda durdy. Ýehowa olary ot bilen ýakyp öldürdi.

Soňra Ýehowa Musa şeýle diýdi: «Her taýpanyň ýolbaşçysy bir taýak getirsin. Hersiniň taýagyna adyny ýaz. Lewi taýpasynyň getiren taýagyna Harunyň adyny ýaz. Taýaklary mukaddes çadyrda goý. Kimi saýlasam, şonuň taýagy güllär».

Ertesi gün Musa taýaklary ýolbaşçylara görkezdi. Taýaklaryň diňe biri gülläpdir. Hatda onda bişen badamlar hem bardy. Ol Harunyň taýagydy. Ýehowa Haruny baş ruhany edip belläpdi. Adamlaram ony Ýehowanyň saýlandygyna düşündiler.