Chiindi maIsrayeli kaachili munkanda, Kkora, Datani, Abbiramu abamwi bali 250 bakapapila Musa. Bakabuzya Musa kuti: ‘Twakatala andinywe! Nkamboonzi nulipa kuba mupati wesu akuchita kuti Aroni abe mupayizi mupati? Jehova uli akati kesu toonse tali kulinduwe aAroni luzutu.’ Jehova taakabotelwa pe anzibakali kuchita. Wakabona kuti nzibakali kuchita bakali kupapila nguwe.

Mpawo Musa wakabuzya Kkora abeenzinyina kuti: ‘Junza muze kutente lyakukombela alimwi umwi awumwi kajisi chitentelo chakwe chili atununkilizyo. Jehova uyootutondeezya muntu ngwasalide.’

Buzuba bwakatobela, Kkora abeenzinyina bali 250 bakakuswaangana aMusa kutente lyakukombela. Kabali nkuko, bakawumpa tununkilizyo mbuli zyakali kuchitwa abapayizi. Jehova wakabuzya Musa aAroni kuti: ‘Amuzwe akati kaKkora abeenzinyina.’

Nikuba kuti Kkora wakiinka kutente lyakukombela kuti akaswaangane aMusa, pesi Datani aAbbiramu bakakaka kwiinka. Jehova wakabuzya maIsrayeli kuti bazwe mumatente aKkora, Datani aAbbiramu. Chakufwambaana, maIsrayeli bakazwa mumatente abantu aaba. Datani aAbbiramu kabali ampuli zyabo bakiima anze amatente  aabo. Kuzwa waawo, nyika yakaanduka mpawo yakabamena boonse! Pesi mulilo uzwa kujulu wakatenta Kkora abeenzinyina bali 250 bakali mutente lyakukombela.

Kuzwa waawo, Jehova wakabuzya Musa kuti: ‘Bweza nkoli zyabapati bamisyobo yoonse yaIsrayeli alimwi ulembe zina lyamuntu umwi awumwi ankoli yakwe. Pesi nkoli yamusyobo waLevi, ulembe zina lyaAroni. Mpawo nkoli eezyo uzibikke mutente lyakukombela alimwi nkoli yamuntu ngundasala iyoomena maluba.’

Buzuba bwakatobela, Musa wakagwisya nkoli zyoonse akuzitondeezya bapati bamisyobo yoonse yaIsrayeli. Nkoli yaAroni yakali amaluba amichelo yama-alimondi ibizidwe. Eezi zyakali kutondeezya kuti Jehova wakali wasala Aroni kuti abe mupayizi mupati.