Израильчилер ээн кургаг ховуга чораанындан бээр элээн үе эрткенде, Корах, Дафан, Авирон болгаш 250 кижи Моисейге удур тура халаан. Олар: «Хөлүн эрте бердиңер! Чүге сен бистиң баштыңчывыс, а Аарон дээди бараалгакчывыс боор чүвел? Иегова чүгле силерниң-биле эвес, а бистиң-биле база чүве-дир» — деп турганнар. Иегова оларның ынчаар алдынганынга таарзынмаан. Харын-даа ону бодунга удур үймээн кылдыр хүлээп алган!

Моисей Корахка болгаш ооң улузунга чугаалаан: «Айдызаар чаагай чыттыг чүүлдерлиг саваларыңар ап алгаш, даарта өргээ-майгын чанынга чедип келиңер. Иегова кымны шилип алганын көргүзер».

Дараазында хүн Корах болгаш 250 кижи өргээ-майгынга чедип келгеннер. Олар аңаа, өргээ бараалгакчылары дег, айдызаар чүүлдерни кыпсып турганнар. Иегова Моисей биле Ааронга: «Корахтан болгаш ооң улузундан ырадыр туруп алыңар» — дээн.

Корах Моисейге чедип кээрге, Дафан, Авирон болгаш оларның өг-бүлелери барбаан. Иегова израильчилерге Корахтың, Дафанның, Авироннуң майгыннарындан ырадыр туруп алырын  айыткан. Израильчилер ону ол-ла дораан күүсеткен. Дафан, Авирон болгаш оларның өг-бүлелери майгыннарының чанынга туруп алганнар. Хенертен чер ийи чарлы бээрге, олар шупту чер адаанче кире берген! А өргээ-майгын чанынга турган 250 кижи биле Корахты дээрден дүшкен от өрттедипкен.

Оон Иегова Моисейге айыткан: «Аймак бүрүзүнүң даргазының даянгыыжын ап ал. Даянгыыш бүрүзүнге ооң ээзиниң адын бижип каг. А Левийниң аймааның даянгыыжынга Аарон деп бижип каг. Оон оларны өргээ-майгынга салып каг. Кымның даянгыыжы чечектели бээр болдур, ону шилип алган боор мен».

Дараазында хүн Моисей шупту даянгыыштарны үндүрүп эккелгеш, аймактарның даргаларынга көргүскен. Аароннуң даянгыыжы чечектели бээрге, миндальдың бышкан чимизи үнүп келген болган. Ынчаар Иегова Ааронну дээди бараалгакчы кылдыр шилип алганын көргүскен.