Noke yotembo yimue osimbu va Isareli va kala vekalasoko, Kora, Datana kuenda Avirama oku kongelamo 250 kalume, va katukila Mose. Ovo vo sapuila vati: ‘Tua kava lene! Momo lie o lingila usongui wetu kuenda Arone o linga ocitunda cinene? Yehova o kasi pokati ketu, eye ka kasi lika love kuenda la Arone.’ Pole, Yehova ka ci sanjukilile. Eye wa ci tenda ndu okuti va kala oku u sinila!

Mose wa sapuila Kora kumue lomanu vaye hati: ‘Hẽla enjui kotavernakulu kuenda neni oviyukilo viene viondalu vieyuka insensu. Yehova o ka tu lekisa ava va tiamẽla kokuaye.’

Keteke lia kuamamo, Kora leci ci soka 250 kalume va enda oku ka lisanga la Mose kotavernakulu. Ovo va timiha insensu ndu okuti va kala ovitunda. Yehova wa sapuila Mose la Arone hati: ‘Litepi la Kora kumue lomanu vaye.’

Ndaño okuti Kora wa endele ku Mose kotavernakulu, pole, Datana, Avirama kuenda apata avo va likala oku enda. Yehova wa sapuila va Isareli oco va tunde pokati kolombalaka via Kora la Datana kuenda Avirama. Vepuluvi liaco, haico va Isareli va tunda  pokati kavo. Datana, Avirama kuenda apata avo va talama puvelo wolombalaka viavo. Vocipikipiki osi va liata, ya toka kuenje ya va ina vosi! Ondalu ya tunda kilu ya timiha Kora kumue lalume vaye va soka 250 vana va kala votavernakulu.

Yehova wa sapuila Mose hati: ‘Tambula ombueti yimue kakulu vepata lepata kuenda soneha olonduko viavo kolombueti viaco. Pole, kombueti yepata lia Lewi, sonehako onduko ya Arone. Vi kapa vokati kotavernakulu kuenje ombueti yulume nda nõla yi yova olonelẽho.’

Keteke lia kuamamo, Mose wa nyañula olombueti viosi kuenda wa vi lekisa kakulu. Ombueti ya Arone ya yova olonẽleho kuenje ya ima amendoa a pia. Lonjila eyi, Yehova wa lekisa okuti eye wa nõla Arone oco a kale ocitunda cinene.